ހޮލީވުޑުން ގެނެސްދޭ ސައިންސް ފިކްޝަން ފިލްމު ސީރީޒް "ޖުރަސިކް" ގެ ކުރިއަށް އޮތް ފިލްމު "ޖުރަސިކް ވޯލްޑް ރީބާތު" ގެ އާ ޓީޒާއެއް ދައްކާލައި އަންގާރަ ދުވަހު ފިލްމުގެ އާ ޓްރެއިލާއެއް ގެނެސްދޭނެކަން އިއުލާންކޮށްފި އެވެ.
އަންނަ ޖުލައި 2 ގައި ސިނަމާތަކަށް ގެންނަން ހަމަޖެހިފައިވާ މި ފިލްމަކީ 2022 ގެ "ޖުރަސިކް ވޯލްޑް ޑޮމިނަން" އާ ގުޅުުވައިގެން ގެނެސްދޭ ފިލްމެކެވެ. މިއީ މި އަހަރުގެ އެންމެ އުންމީދީ އެއް ފިލްމެވެ.
ގެރެތު އެޑްވަޑްސް ޑައިރެކްޓްކޮށްފައިވާ "ޖުރަސިކް ވޯލްޑް ރީބާތު" ގެ ކާސްޓްގައި ސްކާލެޓް ޖޮހަންސަން، މެހެރްޝާލާ އަލީ، ޖޮނަތަން ބެއިލީ، ރުޕަޓް ފްރެންޑް، މެނުއެލް ގާޝިއާ-ރަފްލޯ، ލޫނާ ބްލެއިޒް، ޑޭވިޑް އިއަކާނޯ އަދި އެޑް ސްކެރިން ހިމެނެ އެވެ.
"ޖުރަސިކް ވޯލްޑް ރީބާތު" ގެ ސްކްރީންޕްލޭ ލިޔެފައި ވަނީ 1993 ގެ "ޖުރަސިކް ޕާކް" އާއި 1997 ގެ "ދަ ލޮސް ވޯލްޑް: ޖުރަސިކް ޕާކް" ވެސް ލިޔުނު ޑޭވިޑް ކޮއެޕް އެވެ.