އިޒްރޭލުން އީރާނަށް ދިން ހަމަލާތައް ރައީސުް ޑރ. މުޙައްމަދު މުޢިއްޒު ކުށްވެރިކުރައްވައިފި އެވެ.
ސޯޝަލް މީޑިއާ ޕޯސްޓެއްގައި އެ މަނިކުފާނު މިއަދު ވަނީ އެ ހަމަލާތައް ހަރުކަށި އިބާރާތުން ކުށްވެރިކުރައްވައިފަ އެވެ.
ރައީސް ވިދާޅުވީ، ޔަހޫދީ ދައުލަތުގެ މި އަމަލުތަކަކީ ބައިނަލްއަޤްވާމީ ޤާނޫނުތަކާ ޚިލާފު އަމަލުތަކެއް ކަމަށާއި އޭގެ ސަބަބުން ސަރަހައްދީ ހަމަނުޖެހުން އުފެދިގެންދާނެ ކަމަށެވެ. އަދި ހާލަތު އިތުރަށް ގޯސްވިޔަ ނުދިނުމަށް ވަގުތުން ފިޔަވަޅުތައް އަޅަން ޖެހޭ ކަމަށް ވެސް ރައީސް ވިދާޅުވި އެވެ.
Strongly condemns the Israeli aggression against the Islamic Republic of Iran.
Such acts constitute a serious violation of international law and jeopardise regional peace and stability.
Urgent action must be taken to stop the escalation of tensions.
— Dr Mohamed Muizzu (@MMuizzu) June 13, 2025
މެދުއިރުމަތީގެ ހަމަޖެހުމަށް އޮތް އެންމެ ބޮޑު ނުރައްކާ ކަމަށްވާ އިޒްރޭލުން އިރާނަށް ހަމަލާތަކެއް ދީފައި މި ވަނީ އެ ސަރަހައްދުގެ މަސްރަހު ހޫނުކޮށް، 2023 ގެ އޮކްޓޯބަރުން ފެށިގެން ފަލަސްތީނާ ދެކޮޅަށް ލާއިންސާނީ ބޮޑެތި ޖަރީމާތަކެއް ވެސް ހިންގަމުންދާ ދަނޑިވަޅެއްގަ އެވެ.
އިޒްރޭލުން އިރާނަށް ދިން ހަމަލާ ރައީސް ކުށްވެރި ކުރި އިރު، ފޮރިން މިނިސްޓްރީން ވެސް ނެރުނު ބަޔާނެއްގައި މިކަން ކުށްވެރިކޮށްފައިވެ އެވެ. އެ ބަޔާނުގައި ބުނީ އިސްރާއީލުގެ އިސްތިއުމާރީ ބާރުތަކުން ގާޒާއަށް މެދުކެނޑުމެއް ނެތި ދެމުންގެންދާ ހަމަލާތަކާ ދިމާކޮށް އީރާނަށް ދިން ހަމަލާ އާ ގުޅިގެން މުޅި މެދުއިރުމަތީގެ ސަލާމަތާއި ރައްކާތެރިކަމަށް މީގެ ސަބަބުން އަސަރުފޯރާނެ ކަމަށެވެ.
އެހެންވެ ދިވެހި ސަރުކާރުން ބައިނަލްއަގުވާމީ މުޖުތަމަޢުއަށް އިސްރާއީލުން ކުރަމުންދާ ޣައިރު ޤާނޫނީ އަމަލުތައް ވަގުތުން ހުއްޓާލުމަށް އިސްރާއީލަށް މަޖުބޫރުކުރުވުމަށް ވަގުތުން އަޅަންޖެހޭ ފިޔަވަޅު އެޅުމަށް ބާރުއެޅުމަށާއި، ސަރަހައްދުގެ މަޞްލަހަތު އިތުރަށް ގޯސްވިޔަނުދިނުމަށް އަވަސް ފިޔަވަޅުތައް އެޅުމަށް ވެސް ގޮވާލާފައިވެ އެވެ.