މޯލްޑިވްސް ގޭސް ޕްރައިވެޓް ލިމިޓެޑްގެ ކުރީގެ މެނޭޖިން ޑިރެކްޓަރު ޢަބްދުﷲ މައުމޫން (މާނު) ގެ މައްޗަށް، ރެހެންދި ފްލެޓަކަށް ފައިސާ ނުދައްކައިގެން އެއް މިލިއަނަށް ވުރެ ގިނަ ރުފިޔާ ދައްކަން ސިވިލް ކޯޓުން ހުކުމެއް ކޮށްފިއެވެ.
ރައީސް އަބްދުﷲ ޔާމީންގެ ވެރިކަމުގައި، މައުމޫން، އިސްލާމިކް ބޭންކް (އެމްއައިބީ) މެދުވެރިކޮށް، 2,200,50,000ރ. އަށް، ބައްލަވައިގެންނެވި ރެހެންދި ފްލެޓަކަށް ފައިސާ ނުދައްކައިގެން އިސްލާމިކް ބޭންކުން ކުރި ދައުވާއާ ގުޅިގެން ކުރި ހުކުމެކެވެ.
މިދިޔަ ހަފުތާގައި އެ ހުކުމް އިއްވީ މައުމޫން ކޯޓަށް ހާޒިރުވެފައި ނުވާތީ ޢައިރު ހާޒިރުގަ އެވެ.
ޑިމިނިޝިން މުޝާރަކާ ޕްރޮޕަޓީ ފައިނޭންސިން ފެސިލިޓީއެއްގެ ގޮތުގައި އެމްއައިބީން މައުމޫނަށް ދޫކުރި ފެސިލީގެ ތެރެއިން ނުދައްކައި އޮތް އެއް މިލިއަން އެއްލައްކައަށް ވުރެ ގިނަ ރުފިޔާ އާއި، ޗެރިޓީގެ ގޮތުގައި ދައްކަން ޖެހޭ ހަތް ހާސް ރުފިޔާ ހޯދަން ކުރިދައުވާއާ ގުޅިގެން ސިވިލް ކޯޓުން ހުކުމްކޮށްފައިވަނީ ހަ މަސް ދުވަހުގެ ތެރޭގައި އެ ފައިސާ ދައްކައި ހަލާސް ކުރުމަށެވެ.
އަދި ފައިސާ ދައްކައި ޚަލާސް ކުރަންދެން ރެހެންދި ފްލެޓް އެމްއައިބީން ރަހުނުކޮށްފައިވާ ކަމަށް ވެސް ކޯޓުން ކަނޑައަޅާފައިވެ އެވެ.
މޯލްޑިވް ގޭހުގެ ކުރީގެ އެމްޑީ އަކީ އޭނަގެ ޖިނާއީ ހަތް މައްސަލައެއްގައި ވެސް ކުރިން ދައުވާ އުފުލާފައިވާ މީހެކެވެ. އެއީ އޭނަ މަގާމުގައި ހުންނެވި ދުވަސްވަރި ހިންގެވި ރިޝްވަތުގެ މުއާމަލާތްތަކަކާ ގުޅިގެންނެވެ.