އެމްޑީޕީގެ އިތުރު އެކްޓިވިސްޓެއްގެ ފޯނު ހިފަހައްޓައިފި

އެމްޑީޕީގެ އެކްޓިވިސްޓެއް ކަމަށްވާ އައިޝަތު ޝިމަން އަހުމަދުގެ ފޯނު ފުލުހުން މިރޭ ހިފަހައްޓައިފި އެވެ.

ކްރިމިނަލް ކޯޓުގެ އަމުރުގައިވާ ގޮތުން ޝިމަންގެ ފޯނު ހިފެހެއްޓީ މިދިޔަ މަހުގެ 20 ދުވަހުގެ މެންދުރު 14:30 ހާއިރު އެކްސްގައި ރައީސް ޑރ. މުހައްމަދު މުއިއްޒު އަވަހާރަކޮށްލަން ޖެހޭ ފަދަ މޭރުމަކުން ކޮމެންޓް ކޮށްފައިވާ ކަމަށް ތުހުމަތު ކުރެވޭ މައްސައާ ގުޅިގެންނެވެ. އޭނާގެ ފޯނު ހިފަހައްޓަނީ އެ މައްސަލައާ ގުޅިގެން ހެކި ހޯދަން ކަމަށް އަމުރުގައިވެ އެވެ.

އެ މައްސަލައިގެ ހެކީގެ ގޮތުގައި ފުލުހުން ކޯޓަށް ހުށަހެޅީ އިންޓެލިޖެންސް ރިޕޯޓަކާއި ޝިމަންގެ އެކައުންޓުން ކޮށްފައިވާ ކޮމެންޓެވެ.

އެމްޑީޕީގެ އަންހެނުންގެ ރޫހުން ބުނީ މި އަމުރު ނެރުނީ ފުރައްސާރަކުރުމުގެ ގޮތުން ކަމަށާއި މި ޣައިރު ގާނޫނީ އަމުރު ބާތިލުކޮށް، ސިޔާސީ އަދި މިނިވަން ހިޔާލުފާޅުކުރުމަށް ތަންދީ، އަންހެނުންނަށް ކުރާ ފުރައްސާރަ ހުއްޓާލުމަށް ގޮވާލާ ކަމަށެވެ.

ޝިމަންގެ ފޯނު ހިފަހައްޓާފައިވާއިރު، ފުލުހުންނަށް އިންޒާރު ދިން ކަމަށް ބުނެ އެމްޑީޕީ ހުޅުމާލެ އުތުރު ދާއިރާގެ ރައީސް ފާތިމަތު ޒަހިއްޔާ (ޒާޔާ)ގެ ފޯނު ވެސް ފުލުހުން ވަނީ ހިފަހައްޓާފަ އެވެ.