ރާއްޖޭގެ ސިޔާސީ މަސްރަޙުގައި މީގެ ކުރިން ގަދަ ބާރެއްގެ ގޮތުގައި ފާހަގަކުރެވުނު ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) މިހާރުވަނީ އެޕާޓީގެ ތާރީޚުގައި ކުރިމަތިވެފައިވާ އެންމެ ނާޒުކު މަރުހަލާގެ ތެރޭގަ އެވެ. ކުރީގެ ރައީސް މުޙައްމަދު ނަޝީދު އަލުން ޕާޓީއާ ގުޅިވަޑައިގަތުމާއި، ޕާޓީގެ ޗެއާޕާސަން ފައްޔާޒް އިސްމާއިލް އިސްތިއުފާ ދެއްވުމާއި، އަދި ކުރިއަށް އޮތް ކޮންގްރެސްއަށް ތައްޔާރުވަމުން އަންނަ މި މަރުޙަލާގައި، ޕާޓީގެ ކުރިއެރުމަށްޓަކައި މީގެ ކުރިން ބުރަ މަސައްކަތް ކުރެއްވި ފަރިތަ ޝަޚުސިއްޔަތުތަކަށް އެކަނި ބަރޯސާވެގެން ކުރިއަށް ނުދެވޭނެކަން ފެންނަމުންދާ ޙަގީގަތްތަކުން ދަނީ ސާފުވަމުންނެވެ.
އެހެންކަމުން، 2028 ގެ ރިޔާސީ އިންތިޚާބަށް ކުރިމަތިލުމުގެ ކުރިން، އެމްޑީޕީ އަށް މިހާރު ކުރިމަތިވެފައި ވަނީ ވަރަށް މުހިންމު ނިންމުންތަކެއް ނިންމުމަށެވެ. އެއީ އެޕާޓީގެ މާޒީގެ ކޯޅުންތައް ތަކުރާރު ކުރާނީތޯ ނުވަތަ އެމްޑީޕީ ރިފޯމްކޮށް، ބަދަލުތަކާ އެކު ކުރިއަށް ދާނީތޯ އެވެ؟
ރައީސް ނަޝީދާއި ރައީސް ސޯލިޙްގެ ވާދަވެރިކަން އަލުން ހިނގައިގަތުން:
ނަޝީދު އެމްޑީޕީއާ އަލުން ގުޅިވަޑައިގަތުމުން، މާޒީގެ ބައެއް ހިތި ހަނދާންތައް ނައްތާލައި، އެއްބައިވަންތަކަން އުފެދޭނެ ކަމަށް ގިނަ ބަޔަކު އުންމީދުކުރި އެވެ. ނަމަވެސް މިކަމުގެ ސަބަބުން އެއްބައިވަންތަކަމުގެ ބަދަލުގައި އަލުން ހިނގައިގަތީ 2023 ގެ އިންތިޚާބުގެ ކުރިން ޕާޓީ ދެބައިކޮށްލި ދިގުދެމިފައިވާ ވާދަވެރިކަމެވެ.
ނަޝީދަށް ވަފާތެރި ފަރާތްތަކާއި ކުރީގެ ރައީސް އިބްރާހިމް މުޙައްމަދު ސޯލިޙްގެ ކޭމްޕާ ދެމެދު ކުރެވޭ އިތުބާރު ވަރަށް ކުޑައެވެ. އަދި މިދެފަރާތުންކުރެ އެއްވެސް ފަރާތަކުން އަނެއް ފަރާތަށް ލީޑަރޝިޕް ދޫކޮށްލަން ތައްޔާރަށް ތިބިތަނެއް ނުފެނެ އެވެ. ފާއިތުވި އަހަރު ތެރޭގައި އެތެރޭގައި ހިނގި ވޯޓުލުންތަކާއި، ތާއީދު ހޯދަން ކުރެވުނު މަސައްކަތާއި، ޕްރައިމަރީ ކޮންޓެސްޓްތަކުން ހާމަވެގެންދިޔައީ އެއް މެސެޖެކެވެ.
ހަމަހިމޭން ނަމަވެސް، އެ ދެ ކޭމްޕް އަދިވެސް ވަނީ ދެމިގެންދާ ކޯޅުންގަނޑެއްގެ ތެރޭގައި ތާށިވެފައިކަމެވެ. އެކުގައި އުޅުނު ނަމަވެސް އެ ދެބައި މީހުން އެކީގައި މަސައްކަތެއް ނުކުރެ އެވެ.
ފައްޔާޒް އިސްތިއުފާ ދެއްވުން: ބޮޑު މައްސަލައެއްގެ އަލާމާތެއް
އެމްޑީޕީގެ ޗެއަރޕާސަންގެ މަޤާމުން ފައްޔާޒް އިސްމާއިލް އިސްތިއުފާ ދެއްވީ 2028 އަށް އަމިއްލަ ސިޔާސީ މަޤްސަދުތަކެއް ހާސިލު ކުރުމަށާއި، އަދި ޕާޓީގެ އެތެރޭގެ ހިޔާލު ތަފާތުވުންތަކާއި ފިއްތުންތަކުގެ ސަބަބުންނެވެ. އެ މަނިކުފާނު އިސްތިއުފާ ދެއްވުމުން ދޭހަވަނީ، ޕާޓީގެ އިސް ލީޑަރުންގެ ނުފޫޒު ދެމެހެއްޓުމަށް އެތެރޭގައި ބޮޑު އިސްކަމެއް ދެވޭ އިރު، އާ ވާދަވެރިންނަށް ފުރުސަތު ދިނުމަށް ޕާޓީ އަދިވެސް ތައްޔާރުވެފައި ނުވާކަމެވެ.
ދެން އޮންނަ ރިޔާސީ އިންތިޚާބަށް ކުރިމަތިލެއްވުމަށް އެމަނިކުފާނު މިހައި ކުއްލިގޮތަކަށް އިޢުލާން ކުރެއްވުމުމަކީ، ޕާޓީގެ އެތެރޭގެ ސިޔާސަތުތަކަށް ދިގު މުއްދަތަކަށް ކުރިމަތިވެފައިވާ ގޮންޖެހުންތަކާއި ނާޒުކުކަން ހާމަކޮށް ދިން ކަމެކެވެ. ޕާޓީގެ ލީޑަޝިޕަކީ ހަމައެކަނި ދެ ބޭފުޅުން ކަމަށްވާ ނަޝީދާއި ސޯލިޙްގެ ދެމެދުގައި ހިނގާ ވާދަވެރިކަމަށް ވުރެ މާ ފުޅާ އަދި މުހިންމު ކަމެއްކަން މިކަމުން އެނގި ސާފުވެއްޖެ އެވެ.
އެހެންކަމުން ކުރިއަށް އޮތް އެމްޑީޕީގެ ކޮންގްރެސް އަކީ ހަމައެކަނި އުސޫލީ ކަމަކަށް ވުރެ ބޮޑަށް، ޕާޓީގެ މުސްތަޤްބަލު ކަނޑައަޅާނެ މުހިންމު ނިންމުންތަކެއް ނިންމަން ޖެހިފައިވާ މަރްޙަލާއެކެވެ. މި ކޮންގްރެސް ވެގެންދާނީ، ނަޝީދާއި ސޯލިޙާއި ދެބޭފުޅުން ނިސްބަތްވާ ދެ ކޭމްޕުން ޕާޓީގެ މުސްތަޤްބަލް ކަނޑައަޅާނީތޯ ނުވަތަ އެއްބައިވަންތަ އަދި ދުރުވިސްނޭ އައު ލީޑަޝިޕެއްގެ އޮނިގަނޑު ޕާޓީއިން ޤަބޫލު ކުރާނީތޯ ކަނޑައަޅާނެ މައިދާނަކަށެވެ. އެގޮތުން އެތެރޭގެ ހަގީގީ އިއްތިފާޤަކާ ނުލައި ނަޝީދު ނުވަތަ ސޯލިޙް އިންތިޚާބުކުރަން ޕާޓީން މަސައްކަތްކޮށްފިނަމަ، ޕާޓީ ދެބައިވެ، 2028 ގެ ކުރިން ޕާޓީގެ ބާރު ކެނޑިގެން ހިނގައިދާނެކަމުގެ ބިރު އެބަ އޮތެވެ.
އެމްޑީޕީ އަކީ އިސްލާޙީ ހެޔޮ ބަދަލުތަކުގެ ޕާޓީއެއްގެ ގޮތުގައި ކުރިން ދެކެމުންދިޔަ ޖީލުގެ ވޯޓަރުންގެ ތާއީދު، ކުރިއަރަމުން އަންނަ ލީޑަރުންނަށް ފުރުސަތު ނުދީ، ކުރީގެ ލީޑަރުންނަށް އިސްކަން ދިނުމުން ގެއްލިދާނެ އެވެ. މިހާރުގެ ހާލަތަށް ބަލާއިރު، އެމްޑީޕީ އަށް އެންމެ އެކަށީގެންވާ އަދި ފައިދާކުރަނިވި ނަތީޖާ އަކީ އާ ލީޑަރެއް އުފެއްދުމެވެ.
އެއީ ފާއިތުވި 10 އަހަރު ދުވަހުގެ ސިޔާސީ ކެކުޅުންތަކުން ފަސްބައި ކިލަނބުވެފައިނުވާ ބޭފުޅަކަށް ވާންޖެހޭނެ އެވެ. ޕާޓީގެ ކުރިމަގަށްޓަކައި ޒުވާން ބޭފުޅަކަށް ލީޑަޝިޕް ހަވާލުކުރުމަކީ، ދެ ފެކްޝަންގެ ބޭފުޅުންނަށް ވެސް އެއްބައިވަންތަ ރޭވުންތެރިކަމަކަށް މަގުފަހިކޮށް ދެވޭނެ ކަމެކެވެ.
އެމްޑީޕީ އަށް މިވަގުތު އެންމެ ބޭނުންވެފައި ވަނީ، ޕާޓީއަށް އޮތް އިތުބާރު އަލުން ބިނާކޮށް، އެތެރޭގެ ގޮންޖެހުންތަކަށް ހައްލެއް ހޯދައި، 2028 ގެ ރިޔާސީ އިންތިޚާބަށް އަމާޒުކޮށް، ދުރު ރާސްތާގެ އުންމީދީ ތަސައްވުރެއް ހުށަހަޅައި ދޭނެ ލީޑަރަކަށެވެ. އެމްޑީޕީގެ ވަރުގަދަ ބިންގަލަކީ، އަބަދުވެސް ޒަމާނާ އެއްގޮތަށް ބަދަލުވެ، ޤައުމުގެ އެދުވަސްވަރެއްގެ ޙާލަތުތަކަށް، އުންމީދީ ބަދަލުތައް ގެނެސްދިނުމެވެ. މިކަންކަން ޙާސިލުކުރުމަށްޓަކައި، ފުރަތަމަ ސަމާލުކަން ދޭން ޖެހިފައި ވަނީ ޕާޓީގެ އެތެރޭގެ ކަންކަމަށެވެ.
ވާދަވެރި ޕްރައިމަރީ: ޑިމޮކްރަސީ ހަރުދަނާކުރުން
ދެވަނަ މަގެއްގެ ގޮތުގައި އޮތީ، އެއްވެސް ހުރަހެއްނެތި، ޑިމޮކްރެޓިކް ހަމަތަކުގެ މަތިން ހުޅުވާލެވިގެން ބާއްވާ ވާދަވެރި ޕްރައިމަރީއެކެވެ. އެމްޑީޕީގެ އެތެރޭގެ ހަމަނުޖެހުންތައް ސިއްރުކުރުމުގެ ބަދަލުގައި، ޕާޓީގެ ޑިމޮކްރެޓިކް އުސޫލުތައް ހާމަކޮށް، ނަމޫނާ ދެއްކި ދާނެ އެވެ. އެއީ ތަޖުރިބާކާރުންނާއި އައު ކެންޑިޑޭޓުން ވެސް ހިމެނިގެން، ގިނަ ކެންޑިޑޭޓުން ވާދަކުރާ ޕްރައިމަރީއެއް ބޭއްވުމެވެ. މިފަދަ ޕްރައިމަރީއަކުން ހޮވޭ ފަރާތަކަށް ޤާނޫނީ ބާރު ލިބި، ޕާޓީ އަށް މި ވަގުތު ވަރަށް ބޮޑަށް ބޭނުންވެފައިވާ ސާފު މެންޑޭޓް އުފެއްދޭނެ އެވެ.
ނަމަވެސް، މިފަދަ ޕްރައިމަރީއެއް ވާންޖެހޭނީ ޑިމޮކްރެޓިކް އުސޫލުތަކާއި ހަމަތަކުގެ މައްޗަށް ބިނާވެފައިވާ، ދެފުށް ފެންނަ ޕްރައިމަރީއަކަށެވެ. ސާފުކޮށް ހިންގާ މިފަދަ ވާދަވެރި ޕްރައިމަރީ އަކީ އެމްޑީޕީ އަށް ބޭނުންވާ 'ރީސެޓް ބަޓަން' ކަމުގައި ވެދާނެ އެވެ.
ނިންމުން:
އެމްޑީޕީ މިހާރު ވަނީ ގޮންޖެހުންތަކެއް ކުރިމަތިވެފައިވާ މުހިންމު މަރުހަލާއެއްގަ އެވެ. އެއީ މާޒީގެ ކޯޅުންތައް ތަކުރާރުކުރުން ނުވަތަ އައު ފެށުމަކުން ފަށައިގަތުމެވެ. މިއީ ޕާޓީގެ އާންމު މެމްބަރުން ވަރަށް ގާތުން ބަލަމުންދާ ކަމެކެވެ. އެގޮތުން ޕާޓީގެ އެތެރޭގެ ކަންކަމުގައި ދެބައިވެފައިވާ ބާރުގަދަ ފަރާތްތަކުގެ ނުފޫޒު ނިމުމަކަށް ގެނެސް، ކުރިއަށް ދިއުމަށްޓަކައި ޕާޓީ ތައްޔާރަށް އޮތްތޯ ނިންމަން ޖެހޭ ވަގުތަކީ މިއީ އެވެ.
އެމްޑީޕީ ހަގީގަތުގައި ވެސް 2028 ގެ ރިޔާސީ އިންތިޚާބުގައި ވާދަކޮށް ކާމިޔާބު ކުރަން ބޭނުން ނަމަ، އެ ޕާޓީން ވަކި ޝަޚްސިއްޔަތުތަކާ ގުޅިފައިވާ ސިޔާސަތުތަކަށް ވުރެ މައްޗަށް ގޮސް، މާޒީގެ ލީޑަޝިޕުގެ ބަދަލުގައި މުސްތަޤްބަލަށް އަމާޒުކުރާ ލީޑަޝިޕެއް ޤަބޫލުކުރަން ޖެހެއެވެ. އެއްބައިވަންތަ އެމްޑީޕީ އަކީ އަދިވެސް ވަރަށް ބާރުގަދަ ޕާޓީއަކަށް ވާނެ އެވެ.
ނަމަވެސް މާޒީގެ ކޯޅުންތައް ތަކުރާރުކޮށްގެން އެއްބައިވަންތަކަމެއް ނުހޯދޭނެ އެވެ. އެކަން ބިނާކުރެވޭނީ ހިތްވަރާއި ބަދަލުތަކުގެ މައްޗަށެވެ.