އައްޑޫގެ އާ ސިޓީ ކައުންސިލަށް މެމްބަރުން އިންތިޚާބު ކުރުމަށް މިފަހަރު ވޯޓު ދިނުމުގައި، ތިރީގައިވާ ކަންކަމަށް އަޅުގަނޑު ޚާއްސަ ސަމާލުކަމެއް ދޭނަމެވެ.
ސިޓީ ކައުންސިލް އަށް ހޮވޭ މެމްބަރުންނަކީ ރަށްވެހިކަމުގެ ޚިދުމަތްތަކާ ގުޅޭ ގޮތުން ސިޓީކައުންސިލުން އެކުލަވާލާ ގަވާއިދުތަކަކީ ޤައުމީ ޤާނޫނީ އޮނިގަނޑާ އެއްގޮތްވާ އަދި މުޖުތަމަޢުގެ މަޞްލަޙަތު ޙިމާޔަތްކުރާ ގަވާއިދުތަކެއްކަން ކަށަވަރު ކުރުމުގެ ގާބިލުކަން ހުރި ބަޔަކަށް ވާން ޖެހޭނެ އެވެ.
ސިޓީގެ އަހަރީ ބަޖެޓް ފުރިހަމަ އަށް ދިރާސާކޮށް، ހަރުދަނާ މިންގަނޑުތަކުގެ މަތިން ވަޒަންކޮށް، ދެފުށް ފެންނަ އުސޫލުން ފާސްކުރުމުގެ ޤާބިލުކަން ހުރި މީހަކަށް ކައުންސިލަރުން ވާން ޖެހޭނެ އެވެ. މީގެ އިތުރުން ވެސް އޭނާ ވާން ޖެހޭނީ ޢާންމު ޚިދުމަތްތަކާއި، ޢުމްރާނީ ވަސީލަތްތަކާއި އަދި ތަރައްޤީގެ މަޝްރޫޢުތަކަށް ފައިސާ ކަނޑައެޅުމުގައި ދުރާލާ ރޭވިފައިވާ، ދެމެހެއްޓެނިވި އަދި ރައްޔިތުން އިސްކަންދޭ ކަންކަމަށް ރިޢާޔަތްކޮށް ޒިންމާދާރު ކަމާއެކު ކަންކަން ނިންމުމުގެ ގާބިލުކަން ހުރި މީހަކަށެވެ.
ރަށުގެ ކަންކަން ރާވައި ބެލެހެއްޓުމާއި ވިލަރެސްކުރުމުގައި ސިޓީގެ އެކިއެކި ޑިޕާޓްމަންޓްތަކާއި އިސް މުވައްޒަފުންގެ މަޝްވަރާއާއެކު ހަރުދަނާ ގޮތެއްގައި ރަށު އޮފީހުގެ ހިންގުން ބަލަހައްޓައި ވަޒަންކުރުމުގެ ޤާބިލުކަން ކައުންސިލަރުގެ ކިބައިގައި ހުންނަން ވާނެ އެވެ. އަދި ޝައްފާފުކަމާއެކު ޖަވާބުދާރީވުމާއި، ޢާންމު ވަސީލަތްތައް ހެޔޮގޮތުގައި ބޭނުންކުރެވޭކަން ކަށަވަރުކުރުމުގެ ޤާބިލުކަން ލިބިފައިވާ ފަރާތަކަށް ކައުންސިލަރ ވާންޖެހޭނެއެވެ.
ސިޓީ ކައުންސިލްގެ ބައްދަލުވުންތަކުގައި ރައްޔިތުންގެ ޚިޔާލުތަކާއި ކަންބޮޑުވުންތައް އެކަށީގެންވާ ގޮތެއްގައި ހުށަހަޅައި ތަމްސީލުކުރުމާއި މުޖުތަމަޢުގެ އެންމެ އިސް ބޭނުންތަކާއި އިސްކަންދޭންޖެހޭ ކަންކަން ދެނެގަތުމަށް ރައްޔިތުންނާއެކު ގާތްގުޅުމެއް ބޭއްވުމަކީ ކައުންސިލާގެ ޒިންމާއެއްކަމުގައި ވާހިނދު، އޭނާއަކީ އެފަދަ ގާބިލު މީހަކަށް ވާންޖެހޭނެ އެވެ.
ތަރައްޤީގެ ކަންކަން ރޭވުމުގެ ފުރިހަމަ ޤާބިލުކަމާއެކު، ސިޓީގެ ދުރުރާސްތާ ތަރައްޤީގެ މާސްޓަ ޕްލޭންތައް (ބޯހިޔާވަހިކަން، މަގުތައް، ކުނި މެނޭޖްކުރުން ފަދަ) އެކުލަވާލުމުގައި ޢަމަލީގޮތުން ބައިވެރިވެ، ބިން ބޭނުންކުރުމުގެ އުޞޫލުތަކާއި، ސަރަޙައްދުތައް ކަނޑައެޅުމާއި، ޢުމްރާނީ ތަރައްޤީގެ މަޝްރޫޢުތައް ފުންކޮށް ދިރާސާކޮށް ވަޒަންކުރުމުގެ ޢިލްމީ ޤާބިލުކަން ލިބިފައިވާ ފަރާތަކަށް ކައުންސިލަރު ވާންޖެހޭނެ އެވެ.
ސިޓީގެ މުހިންމު ސިޔާސަތުތަކާގުޅޭ ނިންމުންތަކުގައި މޭޔަރަށް ފަންނީ ލަފާ ފޯރުކޮށްދިނުމާއި، ސަރުކާރުގެ އިދާރާތަކާއި، ވިޔަފާރި ކޮމިއުނިޓީ އާއި، ރައްޔިތުންގެ މެދުގައި ހަރުދަނާ ގުޅުން ޤާއިމުކުރުމަށް މަގުފަހިކުރުމުގެ ޢިލްމީ ޤާބިލުކަން ލިބިފައިވާ ފަރާތަކަށް ކައުންސިލަރ ވާންޖެހޭނެ އެވެ.
ކައުންސިލަރު ވާންޖެހޭނީ މަދުވެގެން ސާނަވީ ތަޢުލީމު ފުރިހަމަކޮށްފައިވުން (އޯ ލެވެލް/އޭ ލެވެލް ނުވަތަ އެއާ އެއް ފެންވަރުގެ ސަނަދެއް) ހާސިލުކޮށްފައިވާ މީހަކަށެވެ. އެގޮތުން ކައުސިލަރު ވާން ޖެހޭނީ ވަރުގަދަ މުޢާމަލާތީ ހުނަރުތަކާއި ލީޑަޝިޕްގެ ޤާބިލުކަން ލިބިފައިވާ މީހަކަށެވެ.
ސިޓީ ކައުންސިލްގެ މެންބަރެއްގެ ޤާބިލުކަމަކީ ހަމައެކަނި ތަޢުލީމީ ސަނަދުތަކަށް ބަލައި ވަޒަން ކުރެވޭނެ ކަމެއް ނޫނެވެ. އެއީ ޢިލްމާއި، ތަޖުރިބާއާއި، އަޚްލާޤީ މިންގަނޑުތަކާއި، މުޖުތަމަޢަށް ޚިދުމަތްކުރުމުގެ ޖޯޝާއި ޖަޒުބާތު އެކުލެވޭ ފުރިހަމަ ޤާބިލުކަމެކެވެ. ޤާބިލު ކައުންސިލް މެންބަރުންނަކީ ސިޓީއެއްގެ ކުރިއެރުމާއި ދުޅަހެޔޮކަމުގެ އަސާސެވެ. އެފަދަ މެންބަރުން ތިބުމުން، ރައްޔިތުންގެ ދިރިއުޅުމުގެ ފެންވަރު މަތިވެ، ސިޓީގެ ދެމެހެއްޓެނިވި ތަރައްޤީ ކަށަވަރުކުރެވި، ރައްޔިތުންނަށް އެކަށީގެންވާ ޚިދުމަތްތައް ފޯރުކޮށް ދެވޭނެ އެވެ.
ކޮންމެ ސިޓީ ކައުންސިލް މެންބަރަކު ވެސް އަންނަނިވި އަޚްލާޤީ މިންގަނޑުތައް ހިފަހައްޓަންވާނެ އެވެ:
1. އަމިއްލަ މަޞްލަޙަތާއި ޢާންމު މަޞްލަޙަތު ފުށުއަރާ ހާލަތްތަކުގައި އެކަން ހާމަކޮށް، އެފަދަ ނިންމުންތަކުން ދުރުހެލިވުން
2. ކައުންސިލްގެ މަސައްކަތުގައި ލިބޭ ސިއްރު މަޢުލޫމާތު ރައްކާތެރިކޮށް ހިފެހެއްޓުން
3. ނިންމުންތަކަށް ނުފޫޒު ފޯރުވިދާނެ ހަދިޔާ ނުވަތަ މަންފާ ބަލައިނުގަތުން
4. ހުރިހާ ރައްޔިތުންނަށް ތަފާތުކުރުމެއްނެތި ހަމަހަމަކަމާއެކު ޚިދުމަތްކުރުން
5. ކައުންސިލްގެ މަސައްކަތުގައި އަބަދުވެސް ޕްރޮފެޝަނަލްނަލްކަމާއި އިޙްތިރާމާއެކު މުޢާމަލާތް ކުރުން
ސިޓީ ކައުންސިލް މެންބަރުންގެ ޤާބިލުކަމަކީ ސިޓީގެ ކުރިމަގު ބިނާކުރުމުގައި އެންމެ މުހިންމު އެއް ބިންގަލެވެ. ޤާބިލު، ޒިންމާދާރު އަދި ނަޒާހަތްތެރި ކައުންސިލް މެންބަރުން ތިބުމުން، ސިޓީގެ ވަސީލަތްތައް އެންމެ ފައިދާހުރި ގޮތުގައި ބޭނުންކުރެވި، ރައްޔިތުންގެ ބޭނުންތަކަށް އަމާޒުކުރެވިފައިވާ ސިޔާސަތުތައް އެކުލަވާލެވި، ދެމެހެއްޓެނިވި ތަރައްޤީ ހާސިލުކުރެވޭނެއެވެ.
ރައްޔިތުން ވޯޓުދޭއިރު، ހަމައެކަނި ކެންޑިޑޭޓުންގެ ވަޢުދުތަކަށް ބެލުމުގެ ބަދަލުގައި، އެ ކެންޑިޑޭޓުންގެ ޤާބިލުކަމާއި، ތަޖުރިބާ އާއި،
އަޚްލާޤީ މިންގަނޑުތަކަށް ބެލުމަކީވެސް ވަރަށް މުހިންމު ކަމެކެވެ. އެހެނީ ޤާބިލު ކައުންސިލް މެންބަރުންނަކީ ރައްޔިތުންގެ ދިރިއުޅުމުގެ ފެންވަރު މަތިކުރުމަށާއި ސިޓީގެ ދެމެހެއްޓެނިވި ތަރައްޤީ ކަށަވަރުކުރުމަށް ކޮންމެހެން ބޭނުންވާ ކަމެކެވެ. އެކަށީގެންވާ ތަޢުލީމާއި، ތަޖުރިބާއާއި، ހުނަރުތަކާއި، އަޚްލާޤީ މިންގަނޑުތަކާއި، ރައްޔިތުންނަށް ޚިދުމަތްކުރުމުގެ ޖޯޝް ހުރި ކައުންސިލް މެންބަރުންނަކީ ކޮންމެ ސިޓީއަކަށްވެސް ލިބޭ އަގުހުރި ވަސީލަތެކެވެ.
ސިޓީ ކައުންސިލް މެންބަރުންގެ ޤާބިލުކަމަކީ ހަމައެކަނި އެ މެންބަރުންގެ އަމިއްލަ ޒިންމާއެއް ނޫނެވެ. އެއީ މުޅި ސިޓީގެ ރައްޔިތުންނާއި، ސަރުކާރާއި، އަދި އެހެނިހެން މުއައްސަސާތަކުގެވެސް ޒިންމާއެކެވެ. އެހެނީ، ޤާބިލު ކައުންސިލް މެންބަރުންނަކީ ދެމެހެއްޓެނިވި، ދުޅަހެޔޮ އަދި ކުރިއަރާފައިވާ ސިޓީއެއް ބިނާކުރުމުގެ އަސާސެވެ.