ޕީއެންސީގެ ސޯޝަލް މީޑިއާ އެކްޓިވިސްޓެއް ކަމަށްވާ މަރިޔަމް ޝިއުނާ ބުރުގާ ނާޅާ ދުވަސްވަރުގެ ފޮޓޯއެއް އާންމުކުރި މައްސަލައިގައި ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދާ ދެކޮޅަށް ދައުވާ ކުރަން ހުށަހަޅައިފި އެވެ.
ޝިއުނާ ކުރި އެކްސްގައި ކުރި ޕޯސްޓެއްގައި ބުނީ އޭނާ ބުރުގާ ނާޅާއިރުގެ ފޮޓޯތައް ސޯޝަލް މީޑިއާގައި އާންމުކުރަމުންދާ މައްސަލައިގައި ޖަމީލުއާ ދެކޮޅަށް ދައުވާކޮށް ހައްގު ހޯދަން ކަމާބެހޭ އިދާރާތަކަށް ހުށަހަޅާފައިވާ ކަމަށެވެ.
"މުހައްމަދު ޖަމީލު އަހުމަދު ސޯޝަލް މީޑިއާގައި ސިޔާސީ ބޭނުމަށް އަޅުގަނޑަށް ފުރައްސާރަކޮށް ހިޖާބު ނުވާއިރުގެ ފޮޓޯތައް އާންމުކޮށް ހަދަމުންދާ މައްސަލައިގައި ޖަމީލުއާ ދެކޮޅަށް ދައުވާ ކުރުމަށް އަދި ގެއްލިފައިވާ ހައްގުތައް ހޯދުމަށް ކަމާބެހޭ އިދާރާތަކަށް ހުށަހަޅައިފިން." ޝިއުނާ ބުންޏެވެ.
ކުރީގެ ނައިބު ރައީސްކަން ކޮށް ވެރިކަމާހެދި ފެންބޮވައިގެން ހުއްޓާ ވެރިކަން ނުލިބުމުން އެކަމުގެ ރުޅީގަ @MJameelAhmed ސޯޝަލްމީޑިއާގައި ސިޔާސީ ބޭނުމަށް އަޅުގަނޑަށް ފުރައްސާރަ ކޮށް ޙިޖާބު ނުވާއިރުގެ ފޮޓޯތައް އާންމުކޮށް ހަދަމުންދާ މައްސަލައިގަ ޖަމީލުއާއި ދެކޮޅަށް ދަޢުވާކުރުމަށް އަދި…
— Mariyam Shiuna (@shiuna_m) January 18, 2026
ޝިއުނާގެ ފޮޓޯއެއް ޖަމީލު ޕޯސްޓްކުރީ މިދިޔަ ހޮނިހިރު ދުވަހު އެވެ. އެގޮތުން ޝިއުނާގެ ކުރީގެ ފޮޓޯއަކާއި ފަހުގެ ފޮޓޯއަކާއެކު ޖަމީލު ހިއްސާކުރެއްވި ޕޯސްޓުގައި އަލް ހުޖުރާތު ސޫރަތުގައި ދޮގު ހަބަރު ފަތުރާ މީހުންނާ ގުޅޭ ގޮތުން އައިސްފައިވާ އާޔަތެއްގެ މާނަ ހިއްސާ ކުރައްވާފައިވެ އެވެ.
ޝިއުނާއާ ގުޅޭ ޕޯސްޓެއް ޖަމީލު ކުރެއްވީ ޕީއެންސީގެ އެކްޓިވިސްޓުން ހިންގާ ކަމަށް ތުހުމަތު ކުރެވޭ ސައިޓެއްގައި ކުރީގެ ރައީސް، އަބްދުالله ޔާމީން އަބްދުލް ގައްޔޫމްގެ ތާއީދާއެކު މާލޭގެ މޭޔަރު ކަމަށް މިނިވަން ކެންޑިޑޭޓެއްގެ ގޮތުގައި ވާދަކުރައްވާ އިސްމާއީލް ޒަރިޔަންދުއާ ގުޅޭ ގޮތުން ސައްހަ ނޫން ޚަބަރެއް ގެނެސްދިނުމާ ގުޅިގެންނެވެ.