ދޮޅު އަހަރުވަންދެން އެމްޑީޕީގެ އެތެރޭގެ އެއްވެސް އިންތިހާބެއްގައި، އެޕާޓީގެ ކުރީގެ ނައިބު ރައީސް އަލްހާން ފަހުމީ އަށް ވާދަނުކުރެވޭގޮތަށް އޭނާ ސަސްޕެންޑްކޮށްފި އެވެ.
އެމްޑީޕީގެ އެތެރޭގެ އެއްވެސް އިންތިހާބެއްގައި އަލްހާނަށް ވާދަނުކުރެވޭގޮތަށް އެމްޑީޕީގެ ފިޔަވަޅު އަޅާ ކޮމެޓީން ނިންމީ، 2014 ވަނަ އަހަރު ބޭއްވި ރައްޔިތުންގެ މަޖިލީހުގެ އިންތިހާބަށް ޕާޓީން ކެންޑިޑޭޓަކު ނެރެފައި ވަނިކޮށް، ޕާޓީގެ މެމްބަރެއްގެ ގޮތުގައި ހުރެ އަމިއްލަ ގޮތުން ފޭދޫ ދާއިރާ އަށް ކުރިމަތިލެއްވުމުން ކަމަށް ބުނެއެވެ.
އެ މައްސަލަ އަށް ޖަވާބުދާރީވުމަށް އެ ކޮމެޓީ އަށް ހާޒިރުކުރުމުން އަލްހާން ވަނީ އަމިއްލަގޮތުން އެ އިންތިހާބުގައި ވާދަކުރެއްވި ކަމަަށް އިއުތިރާފުވެވަޑައިގެންފައި ކަމަށާއި ނަމަވެސް ފިޔަވަޅު އަޅާ ކޮމެޓީ ބަލައިނުގަންނަ ކަމަށް ވިދާޅުވެ އެ ބައްދަލުވުން ދޫކުރައްވާ ވަޑައިގެންނެވި ކަމަށް އެމްޑީޕީން ނެރުނު ބަޔާނެއްގައި ބުނެފައިވެއެވެ.
ޕާޓީގެ ސެކްރެޓޭރިއަޓުން ހުށަހެޅި މިމައްސަލަ ނިމުނު ގޮތުގެ ރިޕޯޓުގައި ބުނެފައިވަނީ. " 2014 ވަނަ އަހަރުގެ މާޗް 22 ވަނަ ދުވަހުން ފެށިގެން ޕާޓީގެ އެތެރޭގެ އިންތިހާބެއްގައި އޭނާ އަށް ވާދަ ނުކުރެވޭނެ ކަމަށެވެ".