އައްޑޫ ސިޓީ ގަން ޕޮލިސް ސްޓޭޝަނުން ހިންގި އޮޕަރޭޝަނެއްގައި މަސްތުވާތަކެއްޗާއި އެކު ފުލުހުންގެ ބެލުމުގެ ދަށަށް 3 މީހަކު އަތުލައިގެންފިއެވެ.
މައުލޫމާތު ލިބިފައިވާ ގޮތުގައި، މިމަހުގެ 25 ވަނަ ދުވަހު ފޭދޫ ގެއަކުން ފުލުހުންގެ ބެލުމުގެ ދަށަށް ގެންގޮސްފައި ވަނީ، 20 އަހަރުގެ މީހަކާއި، 24 އަހަރުގެ މީހެއްގެ އިތުރުން 24 އަހަރުގެ މީހެކެވެ. ފުލުހުންގެ ވެބްސައިޓްގައި ބުނެފައިވާ ގޮތުން މިތިން މީހުންގެ އަތުން މަސްތުވާތަކެތި ކަމަށް ޝައްކު ކުރެވޭ 14 ޕެކެޓް ވަނީ ފެނިފައެވެ.
ފުލުހުން ބުނީ އެމީހުން ތިބި ތަން ބަލައި ފާސްކުރި އިރު މަސްތުވާތަކެތި ކަމަށް ޝައްކު ކުރެވޭ އެއްޗެއް ހުރި ހަތް ޕެކެޓު ފެނިފައިވާ އިރު 27 އަހަރުގެ މީހާގެ ފުރަގަސް ފަރާތަށް ހަތް ޕެކެޓް ލާފައި ހުއްޓާ ފެނިފައިވާ ކަމަށެވެ.
ފުލުހުންގެ ބެލުމުގެ ދަށަށް ގެންދިޔަ މީހުންގެ ތެރެއިން 20 އަހަރުގެ މީހާ އާއި 27 އަހަރުގެ މީހާއަކީ މަސްތުވާތަކެތި ބޭނުން ކުރުމާއި މުދަލަށް ގެއްލުން ދިނުމާއި ވައްކަން ކުރުމާއި މާރާމާރީ ހިންގުމާއި ފޭރުމުގެ ކުށުގެ ރެކޯޑް އޮންނަ މީހެކެވެ. އަދި 24 އަހަރުގެ މީހާއަކީ ވައްކަމުގެ މައްސަލަތަކުގެ ރެކޯޑު އޮންނަ މީހެއް ކަމަށް ވެއެވެ.
އެ މީހުންގެ ބަންދާ މެދު ގޮތެއް ނިންމުމަށް ފޭދޫ މެޖިސްޓްރޭޓް ކޯޓަށް ހާޒިރު ކުރުމުން، މިނިސްޓްރީ އޮފް ހޯމް އެފެއާޒުން ކަނޑައަޅާ ތަނެއްގައި ބަންދުގައި ބައިތިއްބައިގެން ތަޙުޤީޤު ކުރިއަށް ގެންދިއުމަށް 15 ދުވަހުގެ ބަންދުގެ މުއްދަތެއް ވަނީ ދީފަ އެވެ.