މިދިޔަ މަދު ދުވަސްކޮޅުގެ ތެރޭގައި، އިޖުތިމާޢީ ބޯހިޔާވަހިކަމުގެ ޕްރޮގްރާމްތަކުގެ ދަށުން ފަރާތްތައް ހޮވުމުގެ ކަންކަމާ ގުޅޭގޮތުން، ޚާއްޞަކޮށް ޝަރުޠު ފުރިހަމަވުމަށް ކަނޑައަޅާފައިވާ މަތީ ޕޮއިންޓްތަކާ މެދު، ރައްޔިތުންގެ ތެރޭގައި ގިނަ ކަންބޮޑުވުންތަކެއް ހުރިކަން ފާހަގަކުރެވިފައިވެއެވެ. އަދި، ފްލެޓް ލިސްޓުގައި ބައެއް ފަރާތްތަކުގެ ނަންތައް ނުހައްގުން ހިމަނައި ދީފައިވާކަން ވެސް ރައްޔިތުން ފާޅުކުރަމުންދާ ޝުޢޫރުތަކުން އަޅުގަނޑުމެންނަށް ދަނީ އެނގި ހާމަވަމުންނެވެ.
މިފަދަ ކަންކަން ހައްލު ކުރުމަށްޓަކައި، އުޞޫލާ ޚިލާފު ޢަމަލުތައް ރިޕޯޓުކުރެވޭނެ، ހާމަކަން ބޮޑު އަދި މިނިވަން މަންސައެއް ޤާއިމުކުރުމަކީ މިހާރުގެ ހާލަތަށް ވަރަށް ބޭނުންތެރި ކަމެކެވެ.
މިހާރު ބައެއް އާންމު ރައްޔިތުންގެ މެދުގައި، ސިޔާސީ ފަރާތްތަކާ ގާތް ގުޅުން ބޭއްވުމުގެ ސަބަބުން ނާޖާއިޒު ފައިދާތަކެއް ލިބޭނެކަމުގެ ނުބައި ގަބޫލު ކުރުން އިތުރުވެފައިވާކަން ފާހަގަކުރެވެ އެވެ. މިފަދަ ގުޅުންތަކުގެ ތެރެއިން ލިބޭ ފައިދާތަކުގެ ބާވަތްތަކާއި، ކުރިއަށް އޮތްތަނުގައި މިފަދަ ނޭދެވޭ ކަންކަން ހުއްޓުވުމަށް އަޅަން ޖެހޭ ފިޔަވަޅުތައް ދެނެގަތުމަކީ މުހިންމު ކަމެކެވެ. މިކަމުން ދޭހަ ވަނީ، ދައުލަތުގެ ނިޒާމުގެ ތެރޭގައި ސިޔާސީ ނުފޫޒު ވަކި ހިއްޕާލާފައިވާ މިންވަރެވެ.
މިފަދަ ނޭދެވޭ އުސޫލުތައް، ހައްޖު ކޯޓާ ދޫކުރުމާއި، ބޯހިޔާވަހިކަމުގެ ކަންކަމާއި، އަދި ވަޒީފާ ދޫކުރުން ފަދަ މުހިންމު ދާއިރާތަކުންވެސް ފެންނަމުންދާކަން ފާހަގަކުރެވެއެވެ.
ސިޔާސީ މިފަދަ ނޭދެވޭ ކަންކަމުގެ ސަބަބުން، ގިނަ ފަހަރަށް އިންސާފުވެރިކަމާއި ހާމަކަން ބޮޑުކަމާއި ޝަރަފުވެރިކަން ފަހަތަށް ޖައްސާލައެވެ. މިފަދަ އަމަލުތަކުގެ ސަބަބުން ސަރުކާރަށް އާންމުންގެ އިތުބާރު ވަރަށް ބޮޑަށް ގެއްލި، ނޭނގުމެއްގެ ތެރެއިން ނަމަވެސް، ގައުމު މިދަނީ ބިރުވެރިކަމެއްގެ ތެރެއަށް ފެތެމުންނެވެ.
އެޗްޑީސީގެ ބޯޑު މެންބަރުން ރާއްޖެއިން ބޭރުގެ އިންވެސްޓަރުން އަތުން މިލިއަން ޑޮލަރުގެ ރިޝްވަތު ނަގާކަމުގެ ތުހުމަތުތައް ދަނީ ކުރެވެމުންނެވެ. ނުހައްގުން ލިބޭ މިފަދަ ފައިދާތަކާއި ނާޖާއިޒު ބޭނުންތައް ހުއްޓުވުމަށް ނިޒާމު އަވަހަށް އިސްލާހު ކުރުމަކީ ކޮންމެހެން ވެސް ކުރަން ޖެހޭ ކަމެކެވެ.
އިންސާފާއި ހަމަހަމަކަން ގާއިމުވެފައި ނެތް މުޖުތަމަޢެއްގައި ސުލްހަ މަސަލަސްކަން ދެމިގެން ދިއުމަކީ ދުރުކަމެކެވެ. ވުމާއެކު، ހުރިހާ ދާއިރާއަކުން ވެސް ސިޔާސީ ނުފޫޒު ނައްތާލައި، އިންސާފު ގާއިމުކުރުމަށްޓަކައި ހަރުދަނާ ފިޔަވަޅުތަކެއް އަޅަންޖެހެ އެވެ.