އައްޑޫ ސިޓީ އަކީ މީހުން ދިރިއުޅޭ ހަތަރު ޖަޒީރާއެއްގެ މައްޗަށް އެކުލެވިފައިވާ، ރާއްޖޭގެ ދެވަނައަށް އެންމެ ބޮޑު އާބާދީ އޮންނަ ސަރަޙައްދެވެ. މި ސިޓީގައި ހިމެނެނީ ހިތަދޫ، މަރަދޫ، މަރަދޫފޭދޫ، ފޭދޫ އެވެ.
ހިތަދު އަކީ ޠަބީޢީ ގޮތުން ބޮޑު އަދި އާބާދީ ގިނަ ރަށަކަށްވުމާއެކު، ސިޔާސީގޮތުން ތަމްސީލު އިތުރު ރަށެއް ކަމުގައިވިޔަސް، ކޮންމެ ރަށަކީވެސް އައްޑޫގެ ތާރީޚާއި، އިޤްތިޞާދާއި، މުސްތަޤުބަލަށް އެއްވަރެއްގެ މުހިންމުކަމެއް ދެވޭ ޖަޒީރާތަކެވެ. އެހެންކަމުން، ތަރައްޤީއާއި، ޚިދުމަތްތަކާއި، ފުރުޞަތުތައް ހަމަހަމަ އަދި އިންސާފުވެރި ގޮތެއްގައި ހަތަރު ޖަޒީރާގެ މެދުގައި ބެހިގެންދާން ޖެހޭނެއެވެ.
އައްޑޫ ސިޓީގެ މިހާރުގެ ހިންގުމުގެ އޮނިގަނޑަށް ބަލާއިރު، އެންމެ ބޮޑު އެއް ގޮންޖެހުމަކީ ސިޔާސީ ހަމަހަމަކަން ގެއްލުމެވެ. ހިތަދޫގެ އާބާދީ ބޮޑުވުމުގެ ސަބަބުން ރައްޔިތުންގެ މަޖިލީހާއި ކައުންސިލުގައި އެމީހުންގެ އިންތިޚާބީ ގޮނޑި އިތުރުވެ، ނުފޫޒު ބޮޑުވުމަކީ ކުދި ޖަޒީރާ ރަށް ތަކުގެ އަޑު ފަނޑުވެގެންދާ ކަމެކެވެ. މީގެ އިތުރުން، ސަރުކާރުގެ އޮފީސްތަކާއި، ޞިއްޙީ ޚިދުމަތްތަކާއި، މަތީ ތަޢުލީމުގެ ވަސީލަތްތައް ހިތަދޫގައި ޖަމާވެފައި ހުރުމުގެ ސަބަބުން ޚިދުމަތްތައް މަރުކަޒީވެ، އެހެން ރަށްތަކުގެ ރައްޔިތުންނަށް އުނދަގޫތަކާ ކުރިމަތިވެއެވެ.
އިޤްތިޞާދީ ނަޒަރަކުން ބަލާއިރު، އިންވެސްޓްމަންޓްތައް ބޮޑަށް ހިތަދޫއަށް އަމާޒުވުމުގެ ނަތީޖާއެއްގެ ގޮތުން، އަތޮޅުގެ އެހެން ރަށްތަކުގައި ހުރި ވަސީލަތްތަކުގެ ބޭނުން އެންމެ އެކަށީގެންވާ ގޮތެއްގައި ނުހިފޭކަން ފާހަގަކުރެވެއެވެ. މީގެ އިތުރުން، ކުރީގެ އަތޮޅުވެރިކަމުގެ ނިޒާމުގެ ތެރެއިން އުފެދިފައިވާ ފިކުރުތަކާއެކު، ހިތަދޫގެ ދައުރު ބޮޑުވެފައިވާ ކަމުގެ އިޙްސާސްތައް އަދިވެސް ދެމިއޮވެއެވެ. އެއް ސިޓީ ކައުންސިލެއްގެ ދަށުން ދަބީޢީގޮތުން ވަކި ހަތަރު ރަށް ހިންގި ނަމަވެސް، ރަށްރަށުގެ މެދުގައި އޮތް އިޖްތިމާޢީ ތަފާތުކުރުންތަކާއި ދެކޭގޮތަށް ފާހަގަކުރެވޭ ފަދަ ބޮޑު ބަދަލެއް އައިސްފައެއް ނުވެއެވެ.
ކުރިމަތިވަމުންދާ ގޮންޖެހުންތަކުން އަރައިގަތުމަށްޓަކައި، ވެރިކަން ހިންގުމާއި ތަމްސީލުކުރުމުގެ ނިޒާމަށް އިޞްލާޙީ ބަދަލުތަކެއް ގެނައުމަކީ ކޮންމެހެން ބޭނުންތެރި ކަމެކެވެ. އެގޮތުން، އައްޑޫ ސިޓީ ކައުންސިލުގެ އިޚްތިޞާޞްގެ ތެރޭގައި ހިމެނޭ މަރަދޫ، މަރަދޫފޭދޫ، ފޭދޫ އަށް އަމާޒުކޮށް 'ޖަޒީރާ ތަރައްޤީގެ ސަބް-ކޮމިޓީތައް' އުފައްދައި، ކޮންމެ ރަށަކަށްވެސް ތަރައްޤީގެ ވަކި ބަޖެޓެއް ކަނޑައެޅުމަކީ މުހިންމު ފިޔަވަޅެކެވެ.
މީގެ އިތުރުން، ސިޓީ ފެންވަރުގެ ނިންމުންތަކުގައި ހުރިހާ އަވަށެއްގެ ބައިވެރިވުމާއި ހަމަހަމަކަން ކަށަވަރުކުރުމަށްޓަކައި، ކައުންސިލްގެ ކޮމިޓީތަކުގެ ރިޔާސަތު ދައުރުވާނެ އުސޫލެއް ތަޢާރަފުކުރުން ބޭނުންތެރިއެވެ. މިގޮތުން އެންމެ އިސްކަމެއްގެ ގޮތުގައި، ޑެޕިއުޓީ މޭޔަރުގެ މަޤާމަކީ ހިތަދޫ ފިޔަވައި ސިޓީގައި ހިމެނޭ އަނެއް ތިން އަވަށުގެ މެދުގައި ކަނޑައެޅޭ ވަކި އުސޫލެއްގެ ދަށުން ދައުރުވާ މަޤާމެއްގެ ގޮތުގައި މިހާރުން މިހާރަށްވެސް ހަމަޖެއްސުމަކީ، އިދާރީ ހިންގުމުގައި ހަމަހަމަކަން ޤާއިމުކުރުމަށް އެޅޭނެ މުހިންމު ފިޔަވަޅެކެވެ.
މީގެ އިތުރުންވެސް، ޚިދުމަތްތައް ލާމަރުކަޒުކުރުމުގެ ގޮތުން "ޖަޒީރާ މަރުކަޒު" ތަކެއް ގާއިމުކުރެވިދާނެއެވެ. މިސާލަކަށް، ހިތަދޫއަކީ އިދާރީ އަދި ވިޔަފާރީގެ މަރުކަޒެއްގެ ގޮތުގައި ތަރައްޤީކުރެވިދާނެއެވެ. މަރަދޫ، މަރަދޫފޭދޫ އަދި ފޭދޫ ފަތުރުވެރިކަމާއި މަސްވެރިކަމާއި، ދަތުރުފަތުރުގެ މަރުކަޒަކަށް ބަދަލުކޮށް ތަރައްގީ ކުރެވިދާނެއެވެ. އޭގެ ދަށުން އިޤްތިޞާދީ ގޮތުން ބާރުވެރިކުރުވުމަށްޓަކައި ޖަޒީރާ ކުދި އަދި މެދު ފަންތީގެ ވިޔަފާރިވެރިންނަށް ލުއި ލޯނު ދޫކުރުމާއި، މަސްވެރިކަމާއި ދަނޑުވެރިކަމުގެ ކޯޕަރޭޓިވްތައް އުފެއްދިދާނެއެވެ. ހަމައެހެންމެ، ކޮންމެ އަވަށެއްގެ ސަޤާފީ އަމިއްލަވަންތަކަން ދެމެހެއްޓުމަށްޓަކައި ސަޤާފީ މުނާސަބަތުތަކާއި ކުޅިވަރު ޕްރޮގްރާމްތައް ރާވައި ހަމަހަމަކަމާއިއެކު އެހީތެރިކަން ފޯރުކޮށްދެވިދާނެއެވެ.
މި ކަންކަން ތަންފީޒުވުމުން، ވަޒީފާގެ ފުރުޞަތުތައް ހުރިހާ އަވަށެއްގައި ފުޅާވެ، ސިޓީ ހިންގުމުގެ ނިޒާމަށް ރައްޔިތުންގެ އިތުބާރު ބޮޑުވާނެއެވެ. އަދި އަވަށްތަކުގެ މެދުގައި އޮންނަ ފަރަގު ކުޑަވެ، އައްޑޫ ސިޓީގެ އައިޑެންޓިޓީއަކީ އެއްބައިވަންތަ އަދި އިންސާފުވެރި ސިޓީއެއްގެ ގޮތުގައި ހަރުދަނާވެގެންދާނެއެވެ.
މީގެ މަޤްޞަދަކީ ހިތަދޫގެ ދައުރު ކުޑަކުރުން ނުވަތަ އައްޑޫ ސިޓީއަށް ހިތަދޫގެ މުހިންމުކަން ގަބޫލުނުކުރުމެއް ނޫނެވެ. މިއީ އިންސާފުވެރިކަމާއި އެއްބައިވަންތަކަން ޤާއިމުކުރުމަށް އަމާޒުކުރެވޭ މަސައްކަތެކެވެ. ތަރައްޤީ ލާމަރުކަޒުކޮށް، ކޮންމެ އަވަށެއް ބާރުވެރިކުރުވުމުން، އައްޑޫ ސިޓީއަށް ހަރުދަނާ އެއް ސިޓީގެ ގޮތުގައި ކުރިއަށްދެވޭނެއެވެ. މިފަދަ ހުށަހެޅުމަކީ ކޮމިއުނިޓީ ޕެޓިޝަނެއްގެ ގޮތުގައި، ސިޓީ ކައުންސިލަށް ހުށަހަޅާ ޕްރޮޕޯޒަލެއްގެ ގޮތުގައިވެސް ބޭނުންކުރެވިދާނެއެވެ. އަމާޒަކީ ހުރިހާ ޖަޒީރާ އަވަށެއްގެ ހަމަހަމަ ތަރައްޤީ ކަށަވަރުކުރުމެވެ.