އައްޑޫ ސިޓީގެ ގުޅިފައިވާ ރަށްތަކަށް ކަރަންޓު ދިނުމަށް ބޭނުން ކުރާ އިންޖީނުގޭގައި މިއަދު ހެނދުނު އަލިފާނުގެ ހާދިސާއެއް ހިނގައިފިއެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި މި ހާދިސާ ހިނގާފައި ވަނީ މިއަދު ހެނދުނު 7:10 އެހާކަށް ހާއިރުއެވެ.
ފެނަކަ އިންޖީނުގޭގެ މުވައްޒަފަކު 'އައްޑޫލައިވް' އަށް މައުލޫމާތު ދެމުން ބުނި ގޮތުގައި މި ހާދިސާ ހިނގާފައި ވަނީ ކޮންޓްރޯލް ރޫމްގައި ހުރި ލައިޓެއްގައި ކަރަންޓު ޝޯޓެއް ކޮށްގެން ކަމަށެވެ.
" ލައިޓުގައި ޝޯޓެއް ކޮށްގެން އަލިފާން ރޯވުމާއި އެކު މުވައްޒަފުން ވަނީ އަލިފާން ނިވާ ފުޅި ބޭނުންކޮށްގެން އަލިފާން ނިއްވާލާފައި. ނަސީބަކުން އަލިފާންގަނޑު ފެތުރިގެން ނުދޭ."
އައްޑޫ އިންޖީނުގޭގައި އަލިފާނުގެ ހާދިސާއެއް ހިނގާފައިވާކަން ހިތަދޫ ފަޔާރ ސްޓޭޝަނުން ވެސް ވަނީ ޔަޤީންކޮށްދީފައެވެ. ހިތަދޫ ފަޔާރ ސްޓޭޝަނުން ވާހަކަ ދެއްކި މުވައްޒަފަކު ބުނި ގޮތުގައި، ފުލުހުންނާއި އަލިފާން ނިއްވާ މީހުން ދިޔައިރު ވެސް އަލިފާން ނިއްވާލާފައިވާ ކަމަށެވެ.
އިންޖީނުގޭގައި އަލިފާނުގެ ހާދިސާއެއް ހިނގާފައި މިވަނީ، އެތަނުގެ ފަޔަރ އެލާމް ސިސްޓަމްގައި މައްސަލަ ޖެހިފައިވާތާ ގިނަ ދުވަސްތަކެއް ވެފައި ވަނިކޮށެވެ.
އެކަން ހައްލުކުރުމަށް ފެނަކަ ކޯޕަރޭޝަނުން މިހާތަނަށް އެއްވެސް މަސައްކަތެއް ކޮށްފައި ނުވާއިރު، އަލިފާން ނިއްވާ ބައެއް ފުޅިތައް ބާވެގެން ގޮސް ބޭނުން ނުކުރެވޭ ކަމަށް ވެއެވެ.