ކުޑަކުއްޖަކާ ބެހުނު މީހެއްގެ މައްޗަށް ކުށް ސާބިތުވެ 16 އަހަރަށް ޖަލަށް ލާން ކްރިމިނަލް ކޯޓުން ހުކުމްކޮށްފި އެވެ.
އެ ހުކުމް އިއްވާފައި ވަނީ 11 އަހަރުގެ އަންހެން ކުއްޖަކާ ބެހިގެން ދައުވާ އުފުލި މ. މުނިޔާގެ، މާލެ، މުޙައްމަދު އަނިލް، 47، ގެ މައްޗަށެވެ.
އެ މައްސަލައިގައި އޭނަގެ މައްޗަށް ދައުވާކޮށްފައި ވަނީ ކުޑަކުދިންނަށް ޖިންސީ ގޯނާކުރާ މީހުންނާމެދު ހާއްސަ އުސޫލުތަކަކަށް އަމަލުކުރުމުގެ ގާނޫނުގެ ދަށުންނެވެ.
މި ހާދިސާއާ ގުޅިގެން ފުލުހުންގެ ޚިދުމަތަށް މައްސަލަ ހުށަހެޅުމާއެކު، ފުލުހުން ވަނީ އެ މައްސަލައިގެ ތަހުގީގުކޮށްފަ އެވެ. އެގޮތުން މައްސަލައިގައި ހުށަހެޅުނު ހެކިތަކަށާއި ގާނޫނީ ބަހުސްތަކަށް ބެލުމަށް އަނިލްގެ މައްޗަށް ހުކުންކުރީ މި މަހުގެ 15 ގަ އެވެ.
އެ ކުށުގެ އުގޫބާތެއްގެ ގޮތުން އޭނަ 16 އަހަރަށް ޖަލަށްލުމަށް ހުކުމްކުރި އިރު، ދައުވާއާ ގުޅިގެން އަނިލް ބަންދުގައި ހުރި 4 މަހާއި 19 ދުވަސް ހުކުމުގެ މުއްދަތުން އުނިކޮށް، ތަންފީޒުކުރަން ޖެހެނީ 15 އަހަރާއި 7 މަހާއި 11 ދުވަހުގެ ޖަލު ހުކުމެކެވެ.