އައްޑޫ މަރަދޫ ގެއެއްގައި އަލިފާނުގެ ހާދިސާއެއް ހިނގައިފި އެވެ.
ރޭ ދަންވަރު އެ ހާދިސާ ހިނގާފައި ވަނީ އެ އަވަށު މިރިޔާސްގޭގަ އެވެ.
އެމްއެންޑީއެފުން ބުނީ އެ ހާދިސާގެ މަޢުލޫމާތު ރޭ 01:50 ހާއިރު އެމްއެންޑީއެފް ސަދަން އޭރިއާ ކޮމާންޑަށް ލިބުމާ އެކު، އެމްއެންޑީއެފް ސަދަން އޭރިއާ ކޮމާންޑް، ހިތަދޫ ފަޔަ ސްޓޭޝަނުގެ ފަޔަރފައިޓަރުން އެ ގެއަށް ގޮސް އަލިފާން ނިއްވުމުގެ މަސައްކަތްކޮށްފައިވާ ކަމަށެވެ.
އެގޮތުން އަލިފާންގަނޑު ނިއްވައިލެވުނީ މެންދަމު 02:25 ހާއިރު އެވެ.
މި ހާދިސާގައި އެއްވެސް މީހަކަށް އަނިޔާއެއް ލިބުނުކަމުގެ ރިޕޯޓު ލިބިފައި ނުވާ ކަމަށް ވެސް އެމްއެންޑީއެފުން ބުންޏެވެ. ނަމަވެސް ހާދިސާގައި ގެއެއް އެކި ވަރުގެ ގެއްލުންތައް ލިބިފައިވެ އެވެ.