ހުޅުމާލޭގެ ފުރަތަމަ ދެ ފޭސް ގުޅުވައިދޭ ޗެނަލް ޕާކުގެ މޫދުގައި ކުނި ދައުރުވާތީ އެކަން ހުއްޓުވަން، ދާ ޖަހަން ފަށައިފި އެވެ.
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނީ އޮއިވަރާއެކު އެ ޗެނަލް ޕާކަށް ކުނިތައް ޖަމާވަމުންދާ ކަމަށެވެ. އެހެންވެ ދާ ޖަހައިގެން އެތަނަށް ކުނި މަދުކުރުމަށްޓަކައި މިހާރު މަސައްކަތް ކުރިއަށްދާ ކަމަށް ބުންޏެ.
ހުޅުމާލެ ޗެނަލް ޕާކުގެ ގުދުރަތީ ރީތިކަން ދެމެހެއްޓުމަށް އެޗްޑީސީން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން އެ ތަނުގައި މުރަކަ އިންދުމުގެ ޕްރޮގްރާމެއް ވެސް އޮތީ ފަށައިފަ އެވެ.
ޗެނަލް ޕާކުގައި މުރަކަ އާލާކުރުމަށް ހުރަސް އެޅޭނެ ކަމަށް ބުނެ އެޗްޑީސީން ވަނީ އެތަނަށް ކަނޑުއުޅަނދުފަހަރަށް ނުވަދެވޭ ގޮތަށް ވެސް ހަދައިފަ އެވެ.
ގިނަ ބައެއްގެ މެދުގައި މަގުބޫލު ޗެނަލް ޕާކު ސަރަަހައްދަށް މީގެ ދެ ދުވަހެއް ކުރިން ކޯމަސް އައިނެއް ވަނުމާ ގުޅިގެން ވެސް ގިނަ ބައެއްގެ ސަމާލުކަން އެކަމަށް ހުއްޓުނެވެ.