މާލޭގައި ރޭ ބޭއްވި އިހުތިޖާޖުގެ ތެރެއިން ހައްޔަރުކުރި މީހުން ވަގުތުން މިނިވަންކުރުމަށް އެމްޑީޕީން ގޮވާލައިފި އެވެ.
ރޭގެ އިހުތިޖާޖަކީ ރައީސް ޑރ. މުހައްމަދު މުއިއްޒުގެ ސަރުކާރުން ނޫސްވެރިކަމުގެ މިނިވަންކަމަށް ހުރަސްއަޅަމުން ދާ ކަމަށް ބުނެ އެކަމާ ދެކޮޅަށް ކުރިއަށްދިޔަ އެއްވުމެކެވެ.
އެމްޑީޕީން ނެރުނު ބަޔާނެއްގައި ބުނީ ރޭ ހައްޔަރުކުރި މީހުންގެ ތެރޭގައި އެ ޕާޓީގެ ގިނަ އަދަދެއްގެ މެންބަރުން ހިމެނޭ ކަމަށާއި އެ މީހުން ހައްޔަރު ކުރުމަކީ ރާއްޖޭގެ ޑިމޮކްރެޓިކް ނިޒާމާއި ނޫސްވެރިކަމުގެ މިނިވަންކަމަށް ދެމުންދާ ހަމަލާތަކެއްގެ ބައެއް ކަމަށެވެ.
އެމްޑީޕީން ވަނީ ހައްޔަރުކޮށްފައިވާ ހުރިހާ ނޫސްވެރިންނާއި އިހުތިޖާޖުގެ ބައިވެރިން ވަގުތުން މިނިވަން ކުރުމަށް ގޮވާލައިފަ އެވެ. އަދި ގާނޫނުއަސާސީން ރައްޔިތުންނަށް ލިބިދީފައިވާ ހައްގުތަކަށް އިހުތިރާމް ކުރުމަށް ރައީސް މުއިއްޒަށާއި ދައުލަތުގެ މުއައްސަސާތަކަށް އިލްތިމާސް ވެސް ކޮށްފައިވެ އެވެ.
އެމްޑީޕީން ބުނީ ސަރުކާރުގެ މި އަމަލުތަކަކީ ޒިންމާދާރު ކުރުވުމުގެ ދޮރުތައް ބަންދުކުރުމަށް ކުރާ ކަމެއް ކަމަށެވެ.