އެމްޑީޕީގެ ރީނދޫ ލަޝްކަރު އަލުން އަނބުރާ ނުކުމެފައިވާ ކަމަށާއި މި ސަރުކާރު ބަދަލުކުރާނެ ކަމަށް، އެމްޑީޕީގެ ޗެއާޕާސަން ކަމަށް ވާދަކުރައްވާ ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ކެމްޕޭން ނިންމާލުމަށް ރޭ ބޭއްވި ފޯރިގަދަ ޕެރޭޑު ނިންމާލުމަށް ފަހު ވާހަކަ ދައްކަވަމުން ނަޝީދު ތަކުރާރުކޮށް ވަނީ ރައީސް ޑރ. މުހައްމަދު މުއިއްޒު އާއި މި ސަރުކާރު ބަދަލުކުރާނެ ކަމަށް ވިދާޅުވެފަ އެވެ.
"މުއިއްޒުއަށް އެނގިވަޑައިގަންނަވާ އަޅުގަނޑުމެން މި އަންނަނީ މި ސަރުކާރު ބަދަލުކުރާނަން، އަޅުގަނޑުމެން އޭނާ ބަލިކުރާނަން. އަޅުގަނޑުމެން އިރާދުކުރެއްވިއްޔާ އޭނާ ވައްޓާލާނަން،" ނަޝީދު ވިދާޅުވި އެވެ.
މިއަދު ބާއްވާ އެމްޑީޕީގެ ޗެއާޕާސަން އިންތިހާބުގައި ނަޝީދާއި ވާދަކުރައްވަނީ ގަލޮޅު ދެކުނު ދާއިރާގެ މެމްބަރު މީކާއިލް ނަސީމް އެވެ.
މި އިންތިހާބުގައި 50،176 މީހުންނަށް ވޯޓުލުމުގެ ހައްގު ލިބެ އެވެ. އިންތިހާބުގެ ވޯޓުލުން ކުރިއަށްދާނީ މިއަދު މެންދުރު 14:30 އިން ރޭގަނޑު 20:30 އާއި ހަމައަށެވެ.