އެމްޑީޕީގެ ޗެއާޕާސަން އިންތިހާބުން ލިބުނު މޮޅަކީ ރާއްޖޭގެ ޑިމޮކްރެސީއަށް ލިބުނު މޮޅެއް ކަމަށް، އެމްޑީޕީގެ ޗެއާޕާސަން އިންތިހާބު ކާމިޔާބު ކުރެއްވި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ޗެއާޕާސަން އިންތިހާބު ނަޝީދު ކާމިޔާބު ކުރެއްވީ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު މީކާއިލް ނަސީމްއާ ވާދަކޮށެވެ.
އެކްސްގައި ކުރެއްވި ޕޯސްޓެއްގައި ނަޝީދު ވިދާޅުވީ މިއީ ރާއްޖޭގެ ޑިމޮކްރެސީ އާއި އިސްލާހީ މަސައްކަތަށް ލިބުނު ބޮޑު މޮޅެއް ކަމަށެވެ. އަދި އެމަނިކުފާނާ ވާދަކުރެއްވި މީކާއިލަށް ވެސް ނަޝީދު ވަނީ މަރުހަބާ ދަންނަވާފަ އެވެ.
MDP ge lobuvethi membarunnashaai, #BoduBadhalu campaign team ah nuhanu gina shukuru! Miee Dhivehi Raajjeyge democracy aai islaahee masahkathah libunu bodu molheh. Candidate Meekail Naseem ah ves marhaba.
— Mohamed Nasheed (@MohamedNasheed) June 12, 2026
އެމްޑީޕީގެ އެންމެ ބާރުގަދަ މަގާމު ކަމަށްވާ، އެ ޕާޓީގެ ޗެއާޕަސަން ކަމަށް ނަޝީދު އިންތިހާބުވީ ބޮޑު ތަފާތަކުންނެވެ. އެގޮތުން މިހާތަނަށް 130 ފޮށީގެ ނަތީޖާ ލިބިފައިވާއިރު ނަޝީދަށް 8،661 ވޯޓު ވަނީ ލިބިވަޑައިގެންފަ އެވެ. މީކާއީލްއަށް ލިބިފައިވަނީ 4،158 ވޯޓެވެ. މި އިންތިހާބުގައި ބެހެއްޓީ 241 ވޯޓު ފޮށްޓެވެ.
މިއަދު ބޭއްވި އިންތިހާބުގައި ވޯޓުލުމުގެ ހައްގު 50،176 މީހުންނަށް ލިބިފައިވެ އެވެ.
އެމްޑީޕީގެ ޗެއާޕާސަންގެ މަގާމު ހުސްވީ ކުރިން އެ މަޤާމުގައި ހުންނެވި ފައްޔާޒް އިސްމާޢީލް އިސްތިއުފާ ދެއްވުމާ ގުޅިގެންނެވެ. އިންތިޚާބުގެ ކަންކަން ނިމެންދެން މިވަގުތު އެ މަޤާމުގެ މަސްއޫލިއްޔަތުތައް ވަގުތީ ގޮތުން އަދާކުރައްވަމުން ގެންދަވަނީ ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ އެވެ.