ދައުލަތުގެ އާންމު މަންފާއަށް ޓަކައި ހާސިލުކުރަން ބޭނުންވާ އިގްތިސާދީ ސިޔާސަތެއްގެ ދަށުން ހިންގާނޭ މުހިންމު މަޝްރޫއުތައް ކަނޑައެޅުމުގެ ގަރާރު ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެކަށައަޅުއްވައިފި އެވެ.
ރައީސުލްޖުމްހޫރިއްޔާގެ މި ގަރާރަކީ، ދައުލަތުގެ އާންމު މަންފާއަކަށްޓަކައި ހާސިލުކުރަން ބޭނުންވާ އިގްތިސާދީ ސިޔާސަތެއްގެ ދަށުން ނުވަތަ އިޖުތިމާއީ ސިޔާސަތެއްގެ ދަށުން ނޫންނަމަ ސަރުކާރުން ކަނޑައަޅާ އެ ނޫން ވެސް މުހިންމު ސިޔާސަތެއްގެ ދަށުން ހިންގުމަށް ސަރުކާރުން ކަނޑައަޅާ މުހިންމު މަޝްރޫއުތަކާއި، އެ މަޝްރޫއު ހަވާލުކުރެވޭ ފަރާތުން އެންމެ މަދުވެގެން ކުރަންޖެހޭ އިންވެސްޓްމަންޓުގެ އަދަދުތައް ކޮންމެ އަހަރަކު ދިވެހިސަރުކާރުގެ ގެޒެޓުގައި ޝާއިއުކުރަންވާނެކަމަށް ގާނޫނު ނަންބަރު 99/2 (ދިވެހިރާއްޖޭގެ ޓޫރިޒަމާބެހޭ ގާނޫނު) ގެ 5 ވަނަ މާއްދާގެ (މ) ގެ (3) ވަނަ ނަންބަރުގައި ބަޔާންކޮށްފައިވާތީ، އެ ގާނޫނުގެ ދަށުން ޝާއިއުކޮށްފައިވާ ގަރާރެކެވެ.
މީގެ އިތުރުން މި ގަރާރުގެ ޖަދުވަލުގައި، އިސްވެ ބަޔާންކޮށްފައިވާ ސިޔާސަތުތަކުގެ ދަށުން ހިންގުމަށް ސަރުކާރުން ކަނޑައަޅުއްވާފައިވާ މަޝްރޫއުތަކާއި، އެ މަޝްރޫއު ހަވާލުކުރެވޭ ފަރާތުން އެންމެ މަދުވެގެން ކުރަންޖެހޭ އިންވެސްޓްމަންޓުގެ އަދަދުތައް ބަޔާންކޮށްފައިވެއެވެ.
އޭގެ ތެރޭ ހިމެނެނީ:
° ފަތުރުވެރިކަމާ މަދަނީ އުދުންތަކާ ގުޅޭ 5 މަޝްރޫއު (މަދުވެގެން ޖުމްލަ 25 މިލިއަން ޑޮލަރު)
° ދާހިލީ ސަލާމަތާއި ދިފާއީ ރައްކާތެރިކަން އަދި ފަންނިއްޔާތާ ގުޅޭ 5 މަޝްރޫއު (މަދުވެގެން ޖުމްލަ 155 މިލިއަން ޑޮލަރު)
° ބިނާރާއި ގެދޮރުވެރިކަން އަދި އުމްރާނީ ތަރައްގީއާ ގުޅޭ 4 މަޝްރޫއު (މަދުވެގެން ޖުމްލަ 10 މިލިއަން ޑޮލަރު)
° ޒުވާނުން ބާރުވެރިކަމާއި ހަށިހެޔޮކަމާ ގުޅޭ މަޝްރޫއެއް (މަދުވެގެން ޖުމްލަ 20 މިލިއަން ޑޮލަރު)
° މޫސުމީ ބަދަލުތަކާއި ތިމާވެއްޓާ ގުޅޭ 4 މަޝްރޫއު (މަދުވެގެން ޖުމްލަ 17 މިލިއަން ޑޮލަރު)