ޕެރޫގެ މިހާރުގެ ރައީސް ކެއިކޯ ފުޖިމޯރީ ވެރިކަމުގެ 4 ވަނަ ދައުރެއް ކަށަވަރުކޮށްފި އެވެ.
މިދިޔަ މަހު ބޭއްވި އިންތިހާބު އޭނަ ކާމިޔާބުކުރެއްވިކަން މިއަދު އިއުލާންކުރީ އިންތިހާބު ބޭއްވިތާ މަހެއްވާން ކައިރިވެފައި ވަނިކޮށެވެ. ކަނާތު ފިޔައިގެ ކެއިކޯ ހަތަރު ވަނަ ދައުރަކަށް ވާދަކުރެއްވި އިންތިހާބު ބޭއްވީ މިދިޔަ މަހުގެ 7 ގަ އެވެ. އެ އިންތިހާބުގައި ވޯޓް ދިން މީހުންގެ 50.135 ޕަސެންޓް އޭނަ އަށް ލިބިވަޑައިގަތެވެ.
ކެއިކޯ، 51، އާ ވާދަކުރެއްވި ވާތު ފިޔައިގެ ކެންޑިޑޭޓް ރޮބާޓޯ ސަންޗޭޒަށް ލިބިވަޑައިގަތީ ވޯޓް ދިން މީހުންގެ 49.865 ޕަސެންޓެވެ.
ކެއިކޯ ވެރިކަމުގެ ހަތަރު ވަނަ ދައުރާ ރަސްމީކޮށް ހަވާލުވެވަޑައިގަންނަވާނީ މި މަހުގެ 28 ގަ އެވެ.
އޭނަ އަކީ ޕެރޫގެ ކުރީގެ ރައީސް އަލްބާޓޯ ފުޖިމޯރީ އަށް ލިބިވަޑައިގަތް ހަތަރު އަންހެން ބޭފުޅުންގެ ތެރެއިން ދޮށީ ދަރިކަނބަލުންނެވެ. އަލްބާޓޯ އަކީ ޕެރޫގެ ރައީސްކަން 1990-2000 އާ ހަމައަށް ކުރެއްވި ބޭފުޅެކެވެ.
ދެ ކުދިންގެ މަންމަ ކެއިކޯ އަކީ 2022 ގައި ކައިވެނި ރޫޅީފައިވާ ކަނބަލެކެވެ. އޭނަގެ ކުރީގެ ފިރިމީހާ އަކީ މާކް ވިލަނެލާ އެވެ.