ރިޕޯޓްތައް ބުނާ ގޮތުގައި އީރާނުން މިހާތަނަށް، ހުށަހަޅާފައިވާ އެންމެ ޝައުޤުވެރި އެއް ޝަރުތު އެމެރިކާ އަށް ހުށަހަޅައިފި އެވެ.
އެގޮތުން، ހަނގުރާމަ ހުއްޓޭނެ ހަމައެކަނި ގޮތަކީ އެމެރިކާގެ ޙުކޫމަތު ބަދަލުކުރުމެވެ.
އީރާނުގ އެ ބަޔާނަކީ ވޮޝިންޓަނުން، ތެހެރާނާ މެދު ގެންގުޅޭ އާންމު ބަސްމަގާ މުޅިން ތަފާތު އަދި ފުށުއަރާ ބަޔާނެކެވެ. އަހަރުތަކެއް ވަންދެން އެމެރިކާގެ އޮފިޝަލުން ދިޔައީ އީރާނުގެ ސަރުކާރު ބަލިކަށިކޮށް، އެކަހެރިކޮށް، އަދި ބަދަލުކުރުމަށް ފާޅުގައި މަޝްވަރާ ކުރަމުންނެވެ. މިހާރު މިފެންނަނީ އީރާނުންވެސް ހަމަ އެމެރިކާއިން ކުޅުނު ކުޅިވަރު، އެމެރިކާއާ ދެކޮޅަށް ކުޅެން ފެށިތަނެވެ.
ތެހެރާނުގެ މެސެޖަކީ ވަރަށް ސާފު މެސެޖެކެވެ. އީރާނުގައި ވެރިކަން ކުރަންވީ ކާކުތޯ ނިންމުމުގެ ޙައްޤު ވޮޝިންޓަނަށް ލިބިގެންވާ ކަމަށް އެމެރިކާއިން ޤަބޫލުކުރާނަމަ، އެމެރިކާގައި ވެރިކަން ކުރާނީ ކާކުތޯ ސުވާލު އުފެއްދުމުގެ ޙައްޤު އީރާނަށްވެސް ލިބެން ޖެހޭނެ އެވެ.
ސިޔާސީ މުޙައްލިލުން ދެކޭގޮތުގައި، އީރާނު ރައްދު ސިފަވެގެން ދަނީ އެމެރިކާގެ ބާރަށް ކެރިގެން ނިކުމެ ޖެހި ގޮންޖެހުމެއްގެ ގޮތުގައެވެ. ފާޑުކިޔުންތެރިން ދެކެނީ އެއީ ސުލްޙައިގެ މުއާމަލާތްތައް ހުއްޓުވައި، ހަމަނުޖެހުން އިތުރަށް ދިގުދައްމާލުމަށްޓަކާ ގަސްތުގައި އީރާނުން ކޮށްފައިވާ ކަމެއްގެ ގޮތުގައެވެ.
ކޮންމެ ގޮތެއް ވިޔަސް އީރާނުގެ އެ ހުށަހެޅުމަކީ މުޅިން އާދަޔާ ޚިލާފު ޞުލްޙައިގެ ހުށަހެޅުމެކެވެ. އެއިން ދޭހަވަނީ ދެބައިމީހުންގެ ކުރިމަތިލުންތައް އަސްކަރީ އަމާޒުތަކާއި، ދަތިކުރުމުގެ ފިޔަވަޅުތަކާއި، ނިއުކުލިއާރ ހަތިޔާރުގެ މަޝްވަރާތަކާއި މާބޮޑަށް ފެއަށް ޖެހިފައިވާކަމެވެ. ދެ ފަރާތުން ވެސް މިހާރު ފާޅުގައި ސުވާލު އުފައްދަމުންދަނީ އަނެއް ފަރާތުގެ ސިޔާސީ އިސްދާނަކަމުގެ ޝަރުޢިއްޔަތާއި، ދެމިއޮތުމާ މެދުގައެވެ.
ހަނގުރާމަ ފެށުނީ ސަލާމަތާއި ސަރަޙައްދީ ބާރުގެ މައްޗަށް ކަމަށް ވެދާނެއެވެ. އެކަމަކު، މިހާރު ދެ ފަރާތުގެ ހުށަހެޅުންތަކަށް ބަލާއިރު، ދުވަހުން ދުވަހަށް ހުށަހެޅުންތައް މިދަނީ ޒާތީ، ސިޔާސީ، އަދި ނުރައްކާތެރި އެއްޗަކަށް ތަބުދީލުވަމުންނެވެ.
ނޯޓް: މިއީ ހަސަން ލުތުފީގެ ލިޔުއްވުމެކެވެ.