މަރަދޫ ގޯދިއްޔާ ޖަމިއްޔާގެ އިސް ފަރާތްތަކާއި އެކު މަޝްވަރާ ކުރުމަށްފަހު، އެފްސީ ރެސްޕެކްޓްގެ ފަރާތުން މަރަދޫ ވެންބޮޅަފިށި ސްޓޭޑިއަމްގައި ފެށި "އުރީދޫ ރެސްޕެކްޓް ފުޓްސަލް ޗެލެންޖް" މުބާރާތުގެ ގްރޫޕް ސްޓޭޖް މެޗް ނިމުނު ތަނާހެން، ގޯދިއްޔާއިން ދަނޑުގައި ގާއިމްކޮށްފައިވާ ސެޓަޕް ރޫޅާލައިފި އެވެ.
ރެސްޕެކްޓް ޖަމިއްޔާއިން ރޭ ނެރުނު ނޫސް ބަޔާނެއްގައި ބުނެފައިވަނީ މުބާރާތުގައި ކްލަބް އިމިގްރޭޝަން ޓީމް ކެޓުމުން، އެ ޓީމްގައި ހިމެނޭ ގޯދިއްޔާގެ ޖެނެރަލް ސެކްރެޓަރީގެ ފަރާތުން އިންޒާރުތަކެއް ލިބުމަށްފަހު، 25 އޮގަސްޓް 2016ވީ ބުރާސްފަތި ދުވަހު، ދަނޑުގެ އައުޓްލައިން ފާހަނގަ ކުރުމަށް ހަރުކޮށްފައި ހުރި ނަނުތައް ނަގައި ލައިޓްތަކުގެ ކަނެކްޝަން ކަނޑާލާފައިވާ ކަމަށެވެ.
ނަަމަވެސް އެކަން ރަނގަޅުކޮށް އެރޭ ކުޅެން ހަމަޖެހިފައިވާ ގްރޫޕް ސްޓޭޖްގެ ފަހު މެޗްތައް ކުޅެ ނިންމާފައިވަނިކޮށް، 26 ވަނަ ދުވަހު ސިޓީ އަކުން ދަނޑުގައި ހުރި ގޯދިއްޔާގެ ސެޓަޕް ނަގާނެ ކަމަށް އަންގައި ހުކުރު ދުވަހު ހަވީރު ގޯދިއްޔާގެ ސެކްރެޓަރީ އާއި އިތުރު ބަޔަކު ގޮސް ދަނޑުގެ ލައިޓްތައް ނަގައި ސެޓަޕް ރޫޅާލުމާއި ގުޅިގެން މުބާރާތުގެ ކްއާޓަރ ފައިނަލަށް ދަތުރުކުރި ޓީމްތަކާއި މަޝްވަރާ ކުރުމަށްފަހު ކުރިއަށް ހުރި މެޗްތައް ފޭދޫ ފުޓްސަލް ދަނޑަށް ބަދަލުކޮށްފައިވާ ކަމަށެވެ.
ރެސްޕެކްޓްގެ ނޫސް ބަޔާނުގައި ބުނެފައިވަނީ، ގޯދިއްޔާއަށް ކުރިއަށް އޮތް ތަނުގައި އެއްބާރުލުމެއް ނުދޭނެކަމަށާއި، އެ ޖަމިއްޔާގެ އެއްވެސް ހަރަކާތެއްގައި އެފްސީ ރެސްޕެކްޓްއިން ބައިވެރި ނުވާނެކަމަށެވެ.
މުބާރާތުގެ ގްރޫޕް ސްޓޭޖް ނިމުނު އިރު ކުއަޓަރ ފައިނަލަށް ދަތުރުކޮށްފައިވަނީ
ގްރޫޕް އޭ: ސަދަން ޓްރާންސްޕޯޓް ލިންކް
ކަސްޓަމްސް ރިކްރިއޭޝަން ކްލަބް
ގްރޫޕް ބީ އޭއައިއޭ ރިކްރިއޭޝަން ކްލަބް
ހިތަދޫ ޕޯޓްސް ލިމިޓެޑް
ގްރޫޕް ސީ މޯލްޑިވިއަން
އެފްސީ ހެލްތު
ގްރޫޕް ޑީ ޓީމް ފެނަކަ
އެފްސީ ޓްރިޕްލް އޭ