އަކްޖަޒީރާއިން ގެނެސްދިން "ސްޓީލިން ޕެރަޑައިސް" ގެ ސަބަބުން ރައީސް އަބްދުﷲ ޔާމީންގެ މަގްބޫލްކަން އިތުރުވެ، ރާއްޖެ އާއި މެދު ގިނަ ބައެއްގެ ޝައުޤުވެރިކަން ބޮޑުވެއްޖެކަމަށް ވިލުފުށީ ދާއިރާގެ މެމްބަރު އަދި ޕީޕީއެމްގެ ޕާލިމެންޓްރީ ގްރޫޕްގެ ނައިބް ލީޑަރ ރިޔާޒު ރަޝީދު ވިދާޅުވެއްޖެއެވެ.
Al Jazeera report ge sababun Raees Yameen ge maqboolu kan ithuruve Raajje aai medhu gina baeh ge shauqu verikan bodu vejje…!
— Riyaz Rasheed (@riyaz_rasheed) September 9, 2016
މި މަހުގެ 7 ވަނަ ދުވަހު އަލްޖަޒީރާއިން ގެނެސްދިން ރިޕޯޓްގައި ރައީސް ޔާމީން އާއި އެމަނިކުފާންގެ ސަރުކާރަށް ކަރަޕްޝަންގެ ބޮޑެތި ތުހުމަތުތަކެއް ވަނީ ކޮށްފައެވެ. އެގޮތުން މަނީ ލޯންޑްރިންއާއި، ކަރަޕްޝަނާއި، ގޭންގް ހަރަކާތްތައް ފަދަ އެތައް ތުހުމަތެއް ވަނީ ކޮށްފައެވެ.
ސަރުކާރުން ވަނީ އަލްޖަޒީރާއިން ގެނެސްދިން ރިޕޯޓްގައި ހިމެނޭ ހުރިހާ ވާހަކަތަކެއް ދޮގު ކޮށްފައެވެ.
އަލްޖަޒީރާގެ ރިޕޯޓާއި ގުޅިގެން ބައިނަލް އަގްވާމީ އެކި މީޑިއާތަކުގެ ފަލަ ސުރުހީއަށް މިވާހަކަތައް ވަނީ އަރާފައެވެ. އެގޮތުން ދުނިޔޭގެ ނަން މަޝްހޫރު މީޑިއާތައް ހިމެނެއެވެ.
ސްޓީލިން ޕެރަޑައިސްގައި ގެނެސްދިން މަނީ ލޯންޑްރިންގެ ބައިނަލްއަގްވާމީ ތަހްގީގެއް ކުރަން ތައްޔާރުވަމުން އަންނަ ކަމަށް އަލްޖަޒީރާއިން ވަނީ ރިޕޯޓްކޮށްފައެވެ.
ސަރުކާރަށް ނިސްބަތްވާ މެމްބަރުންނާއި، ވަޒީރުން އަދި ސަރުކާރަށް ތާއިދު ކުރާ ފަރާތްތަކުން އަލްޖަޒީރާ ރިޕޯޓްގައި "އާކަންތަކެއް" ހިމެނިފައި ނުވާތީ ދަނީ ފާޑު ކިޔަމުންނެވެ. އެފަރާތްތަކުން ބުނާ ގޮތުގައި މިވާހަކަތަކަކީ ދިވެހިން އަޑުއަހާ ފޫހިވެފައިވާ ވާހަކަތަކެއް ކަމަށެވެ.