ރޭ ޕީޕީއެމް ޔާމީން ފެކްޝަނުން ބޭއްވި 'އަސްލު' ޖަލްސާ ފެނިފައި ވަރަށް އުފާވާ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އިދިކޮޅު ލީޑަރު، ރައީސް ނަޝީދު މިއަދު ކުރެއްވި ޓުވީޓެއްގައި މިހެން ވިދާޅުވެފައިވާއިރު އެމަނިކުފާނު ވަނީ ރާއްޖެ ކުރިއަރާ ދާނީ ގިނަ ޕާޓީ އެކުލެވޭ ސިޔާސީ ނިޒާމެއް ގާއިމުވެގެންކަމަށް ތަކުރާރުކުރައްވާފައެވެ.
PPM ge RY faction jalsa feni varah ufaavey. Raaje kuri araa, dhri ulhun thanavas vaanee, gina party ekulevey siyaasee nizam in.
— Mohamed Nasheed (@MohamedNasheed) November 5, 2016
ރައީސް ނަޝީދަކީ ވެރިކަން ކުރެއްވި ދުވަސްވަރުވެސް، ވެރިކަމުން އިސްތިއުފާ ދެއްވުމަށް ފަހުގައިވެސް މިރާއްޖޭގައި ވާދަވެރި، ގިނަ ޕާޓީ އެކުލެވޭ ސިޔާސީ ނިޒާމެއް ގާއިމުކުރުމަށް ތާއީދުކޮށް ވަރަށް ބޮޑަށް އަޑުއުފުލައި އެކަމަށް ބާރު އަޅާފައިވާ ރައީސެކެވެ.
ރައީސް ނަޝީދަކީ މިހާރު އޮތް ރައީސް ޔާމީނުގެ ވެރިކަމުގައި ޓެރަރިޒަމްގެ ކުށް ސާބިތުވެ ޖަލަށް ލުމަށް ހުކުމްކޮށް ޖަލުގައި ހުކުމް ތަންފީޒުކުރަމުން ދަނިކޮށް ބޭސް ފަރުވާއަށް ރާއްޖެއިން ބޭރަށް ވަޑައިގެން އިނގިރޭސި ވިލާތުގައި ސިޔާސީ ހިމާޔަތް ހޯއްދަވައިގެން ހުންނެވި ބޭފުޅެކެވެ.
ނަމަވެސް ވަރަށް އަވަހަށް ރާއްޖެ އެނބުރިވަޑައިގަންނަވާނެ ކަމަށް ދާދި ފަހުން އެމަނިކުފާނު ވަނީ ލަންކާއަށް ކުރެއްވި ދަތުރުފުޅެއްގައި ނޫސްވެރިންނާ ބައްދަލުކޮށް ހާމަކޮށްފައެވެ.