އައްޑޫ ސިޓީގެ ހިތަދޫގައި މިއަދު ފެށި ޒެފިއާ ފުޓްސަލް ކަޕް 2016ގެ ފުރަތަމަ މެޗު 0-10 ގެ ބޮޑު ނަތީޖާއިން ސްކޫޕް ކަންމަތި ޓީމު އެފްސީ ޖޫނިއާސްގެ މައްޗަށް ކުރި ހޯދައި ފެށުން ރަނގަޅު ކޮށްފިއެވެ.
ގްރޫޕް އޭ ގެ ދެ ޓީމު ބައްދަލުކުރި މިމެޗުގައި ސްކޫޕް ޓީމު ވަނީ ރަނގަޅު ކުޅުމެއް ދައްކައި މެޗުގެ ކުރީކޮޅު ގޯލު ޖަހާފައެވެ. މިމެޗުގައި ސްކޫޕް ޓީމުގެ އިބްރާހިމް އިންޝާލް އަދި އިބްރާހިމް މުހައްމަދު، ދެކުޅުންތެރިންވެސް ވަނީ ހެޓްރިކް ހަދާފައެވެ.
މެޗުގެ ފުރަތަމަ ހާފުގައިވެސް ސްކޫޕް ވަނީ 0-5 ގެ ފަސޭހަ ލީޑެއް ހޯދާފައެވެ. ދެވަނަ ހާފުގައި ފުރަތަމަ ހާފެކޭ އެއްފަދައިން ރަނގަޅު ކުޅުމެއް ދައްކައި އިތުރު ފަސް ގޯލު އެފްސީ ޖޫނިއާސް ކޮޅަށް ޖަހާފައިވެއެވެ.
މެޗުގެ ކުރިން ކުޅެވުނު ހިތަދޫ އަންހެން ޓީމާއި މަރަދޫ އަންހެން ޓީމު މެޗު 0-1 ގެ ނަތީޖާ އިން ކާމިޔާބުކޮށްފައިވަނީ ހިތަދޫ ޓީމެވެ. މެޗުގައި ފެނިގެން ދިޔަ ހަމައެކަނި ގޯލު ފެނިގެން ގޮސްފައިވަނީ ހިތަދޫ ޓީމުގެ އަލްމާގެ ފަރާތުންނެވެ.
މުބާރާތުގެ ގްރޫޕް ސްޓޭޖުގެ މެޗުތައް މާދަމާވެސް ކުރިއަށް ދާނެއެވެ. ދެމެޗެއް މާދަމާ ކުޅޭއިރު ފުރަތަމަ މެޗުގައި ވާދަކުރާނީ ޗެލެންޖާސް އާއި އެފްސީ އުސްގަނޑައެވެ. ދެވަނަ މެޗުގައި އެފްސީ ފަސްގަނޑަ ނިކުންނާނީ އެފްސީ ސީރިއަސްއާއި ދެކޮޅަށެވެ.
މުބާރާތުގެ މެއިން ސްޕޮންސަރަކީ އޮންދިގޯ ޓްރޭޑާސްއެވެ. ކޯސްޕޮންސަރަކަށް އައްޑޫ ސިޓީ ކައުންސިލް، ޓެލެކޮމް ޕާޓްނަރަކަށް ދިރާގު އަދި ޕްރިންޓިން ޕާޓްނަރަކީ ކޮންޓްރޯލް ޕީ އެވެ. މުބާރާތުގެ މީޑިޔާ ޕާޓްނަރަކީ "އައްޑޫ ލައިވް" އެވެ.
މެޗުތައް ބައްލަވާލެއްވުމަށް ވީހާވެސް ގިނަ ބޭފުޅުން އީދިގަލި ދަނޑަށް ވަޑައިގެން ދެއްވުމަކީ މުބާރާތް އިންތިޒާމު ކުރާ ފަރާތުގެ ވަރަށް ބޮޑު އެދުމެކެވެ. ސަޕޯޓު ކުރުމުގައި ކުޅިވަރުގެ ރޫހާ އެއްގޮތަށް ދެމިތިބުމަށް އެފްސީ ޒެފިއާ އިން އެންމެހާ ސަޕޯޓަރުންނަށްވެސް އިލްތިމާސް ކޮށްފައިވެއެވެ.