އައްޑޫ ސިޓީގެ ހިތަދޫ ބޮޑު މަގުގައި ދުވަސްވީ މީހަކު މަގު ހުރަސް ކުރަނިކޮށް ބާރަށް ދުއްވާފައިދިޔަ ސައިކަލަކުން ޖެހި ނުރައްކާތެރި އެކްސިޑެންޓެއް ހިނގައިފިއެވެ.
އެކްސިޑެންޓު ހިނގާފައިވަނީ ހިތަދޫ ހަތެއް އެގާރަ ފިހާރަ ކައިރިންނެވެ. ހަތެއް އެގާރަ ފިހާރައިން ނިކުތް މީހާ މަގު ހުރަސްކުރަނިކޮށް ބާރަށް ދުއްވާފައި އައި ސައިކަލު ކޮންޓްރޯލް ނުވެ އެމީހާގައިގައި ޖެހިފައި އެކްސިޑެންޓު ހިނގާފައިވާއިރު ސައިކަލު ދުއްވާފައި ދިޔަ ކުއްޖާވަނީ މަގުގައި ހުރި ގަސް ޖަހާ ޕޮޓެއްގައި ޖެހިފައެވެ.
އެކްސިޑެންޓުގައި އަނިޔާވެފައިވި އުމުރުން ދުވަސްވީ އަންހެން މީހާގެ ހާލު ސީރިއަސް ކަމަށް މައުލޫމާތު ލިބިފައިވާއިރު އެކްސިޑެންޓުގައި ދެން އަނިޔާވި މީހާވެސް އޮތީ ސީރިއަސް ހާލުގައެވެ.
އެކްސިޑެންޓުގައި ސައިކަލު ދުއްވާފައި ދިޔައީ 18 އަހަރު ނުވާ ކުޑަ ކުއްޖެއް ކަމަށް މައުލޫމާތު ލިބިފައިވެއެވެ. މިމައްސަލަ މިހާރު މޯލްޑިވްސް ޕޮލިސް ސާވިސް އިން ދަނީ ތަހުގީގު ކުރަމުންނެވެ.