ފުލުހުންގެ ވާޖިބަށް ހުރަސްއެޅި ކަމުގެ ތުހުމަތުގައި ދައުވާ އުފުލާފައިވާ ރާއްޖެ ޓީވީގެ ދެ ނޫސްވެރިންކަމަށްވާ މުހައްމަދު ވިސާމް އާއި ލީވާން އަލީ ނަސީރުއަށް ހުކުމް ކުރުން އަންނަ ޖެނުއަރީ މަހުގެ 24 ވަނަ ދުވަހަށް ފަސްކޮށްފިއެވެ.
ލީވާން އާއި ވިސާމްއަށް ހުކުމް ކުރުމަށް ކްރިމިނަލް ކޯޓުގައި މިއަދު ބޭއްވި ޝަރީއަތްވަނީ ސިއްރުކޮށްފައެވެ. މައުލޫމާތު ލިބިފައިވާ ގޮތުގައި ލީވާން އާއި ވިސާމްގެ މައްޗަށް ހަތަރު މަހާއި 24 ދުވަހުގެ ހުކުމެއް ކުރަން އޮތް ނަމަވެސް އެދެމީހުންގެ ވަކީލުންގެ ފަރާތުން އެދިފައިވަނީ ޖުރިމަނާ އަކަށެވެ.
ވިސާމް އާއި ލީވާންގެ މައްޗަށް ދައުވާ އުފުލާފައިވަނީ މިދިޔަ އަހަރުގެ ނޮވެމްބަރު މަހުގެ 2 ވަނަ ދުވަހުގެ ރޭ މާފަންނު ސްޓޭޑިއަމް ސަރަހައްދު އޮޕަރޭޝަނަކަށް ބަންދުކޮށްފައި ވަނިކޮށް އެސަރަހައްދުން ރާއްޖެ ޓީވީގެ ސީއީއޯ ހުސެއިން ފިޔާޒް މޫސާ ހައްޔަރު ކުރަނިކޮށް އެތަނަށް ވަދެ ފުލުހުންގެ ވާޖިބަށް ހުރަސްއެޅިކަމުގެ ތުހުމަތުގައެވެ.
ލީވާން އަދި ވިސާމްގެ މައްޗަށް ހުކުމް ނުކުރުމަށް ގިނަ އަދަދެއްގެ ނޫސްވެރިންނާއި ޢާއްމުން އަދި ސިޔާސީ ފަރާތްތަކުން ވަނީ ގޮވާލާފައެވެ.