ދައުލަތުން އެކަނިވެރި މައިންނާއި ބަފައިންނަށް ދަރިން ބެލެހެއްޓުމަށް ދޭ ފައިސާ ކައިވެންޏަށް ފަހުވެސް ބައެއް މީހުން ނަގާފައިވާ ކަން ހެލްތް މިނިސްޓްރީގެ އޮޑިޓް ރިޕޯޓުން ހާމަވެއްޖެއެވެ.
ހެލްތް މިނިސްޓްރީގެ 2014 ވަނަ އަހަރުގެ އޮޑިޓް ރިޕޯޓުގައި ބަޔާންވެފައިވާ ގޮތުން ކައިވެނި ކުރުމަށް ފަހު 'އެކަނިވެރިނޫން މައިން' ނަގާފައިވާ ފައިސާގެ ޖުމުލަ އަދަދު 983،000 އަށް އަރާފައިވެއެވެ.
އޮޑިޓް ރިޕޯޓުގައި ބުނެފައިވަނީ މިފަދަ ކަންތައްތައް ދިމާވަނީ ދިވެހި ރާއްޖޭގައި ވަރި/ކައިވެނި ބަލާ ނިޒާމުގެ ދޯހަޅި ކަމުންނެވެ. މީހުން ކައިވެނި ކުރުމުން ނުވަތަ ވަރިކުރުމުން ބައެއް މައްސަލަތައް ރިޕޯޓު ނުކުރެވޭތީ އާއި މައްސަލަ ރިޕޯޓުކުރުމުން ރިކޯޑު ނުކުރެވޭ މިފަދަ ކަންތައް ދިމާވުމުން ފާހަގަ ކުރެވެއެވެ.
ދައުލަތުން ބައިވެރިޔަކާއި ނުލާ ދަރިން ބޮޑުކުރާ އެކަނިވެރި މައިންނާއި ބަފައިންނަށް މަހަކު 1،000 ދެވެއެވެ. އަދި އެކަނިވެރި މައިންނާއި ބަފައިން ބަލަހައްޓާ ކުއްޖަކަށްވެސް މަހަކު 1،000 ރުފިޔާ ދެވެއެވެ. ނަމަވެސް ކައިވެންޏެއް ކުރުމުން މިފައިސާ ދައުލަތުން އާއިލާތަކަށް ދިނުން ހުއްޓާލައެވެ.
މިފަދަ އެލަވަންސްތައް ހައްގުނުވާ ފަރާތްތަކަށް ދިނުން ހުއްޓުވުމަށް އެލަވަންސް ލިބުމަށް ޝަރުތު ހަމަވާތޯ ބެލޭނެ ހަރުދަނާ ނިޒާމެއް ސަރުކާރުން ގާއިމު ކުރަން ޖެހެއެވެ.