ރާއްޖެ ޓީވީގެ ކެމެރާމަން އާދަމް ޒަރީރުގެ މައްޗަށް ފުލުހުންގެ ދައުރު އަދާކުރުމަށް ދަތިކުރި ކަމަށް ބުނެ ދައުލަތުން އުފުލާފައިވާ ދައުވާ ޒަރީރުގެ މައްޗަށް ސާބިތުވެފައިވާ ކަމަށް ކޯޓުން ހުކުމް ކުރުމާއި ގުޅިގެން ކުރީގެ ރައީސް މުހައްމަދު ނަޝީދު އެކަމަށް ފާޑުކިޔައިފިއެވެ.
ނަޝީދުގެ ޓުވިޓާގައި މިއަދު ކުރި ޓުވީޓެއްގައި ވިދާޅުވެފައިވަނީ ޒަރީރުގެ މައްޗަށް ހިންގާފައިވަނީ ބޭއިންސާފު ޝަރީއަތެއް ކަމަށެވެ. އަދި އޭނާއަށް ކުރި ހުކުމް ބާތިލު ކުރަން ޖެހޭ ކަމަށް 13 އަހަރުގެ ޖަލު ހުކުމެއް ތަންފީޒު ކުރައްވަމުންދާ ނަޝީދު ވިދާޅުވެފައިވެއެވެ.
@Raajje_tv ge noosveriya Ahmed Zareer ge machah hingee beyinsaaf shareeatheh. Hukum baathil kuran jehey.
— Mohamed Nasheed (@MohamedNasheed) February 27, 2017
ދައުލަތުން ޒަރީރާއި ދެކޮޅަށް އުފުލި ދައުވާ ސާބިތުވެ އޭނާ ވަނީ 3،000 ރުފިޔާ އިން ޖޫރިމަނާ ކޮށްފައެވެ. ނަމަވެސް ޒަރީރު ވަނީ ދައުވާ އަށް އިންކާރުކޮށްފައެވެ.
ދައުލަތުން ހުށައެޅި ހެކިންގެ ހެކިބަސް ނަގާފައިވާއިރު ދައުވާގައި ބުނެފައިވަނީ ޒަރީރު ވަނީ މިދިޔަ އަހަރުގެ މާޗް މަހުގެ 25 ވަނަ ދުވަހުގެ ރޭ އިދިކޮޅު ފަރާތްތަކުން މާލޭގައި ބޭއްވި މުޒާހަރާއާ ގުޅިގެން ބޮޑުތަކުރުފާނު މަގާއި މުހައްމަދު އިސްމާއީލް ދީދީ ގޯޅި ގުޅުނު ކަންމަތި ބެރިކޭޑް ޖަހައި ބަންދުކޮށްފައި ވަނިކޮށް، ފުލުހުން ބަންދުކޮށްފައިވާ ސަރަހައްދަށް ގަދަކަމުން ވަދެ އެ ސަރަހައްދުގައި ޖަހާފައިވާ ފުލުހުންގެ ޝީލްޑްތަކުގައި ކޮއްޕައި ފުލުހުންގެ ދައުރު އަދާކުރުމަށް ޒަރީރު ދަތިކޮށްފައިވާ ކަމަށެވެ.