އައްޑޫ ސިޓީ ފޭދޫގައި ހުންނަ އެމްޑީޕީ އޮފީހުގެ ކުރިމަތީގައި ހުރި ޖޯލިތަކާއި ގޮނޑިތައް ފުލުހުން ގެންގޮސްފިއެވެ.
ފުލުހުން މިއަދު ހަވީރު އެމްޑީޕީ އޮފީހަށް ގޮސް އެ އޮފީސް ކުރިމަތީގައި ސްކްރީން ބަހައްޓައިގެން ޖަލްސާތައް ބެލުމަށް ނުތިބުމަށް ވަނީ އަންގާފައެވެ. އަދި އޭގެ ފަހުން އެސަހަރައްދުގައި ހުރި ޖޯލިތަކާއި ގޮނޑިތައް ފުލުހުންގެ ބެލުމުގެ ދަށަށް ވަނީ ގެންގޮސްފައެވެ.
ފޭދޫގައި ހުންނަ އެމްޑީޕީ އޮފީހަށް މިއަދު 3 ފަހަރެއްގެ މަތިން ފުލުހުން ވަނީ ގޮސްފައެވެ. މީގެ ކުޑައިރުކޮޅެއް ކުރިން ފުލުހުން އެސަރަހައްދަށް ގޮސް އެމްޑީޕީ އޮފީސް ކުރިމަތީގައި ބަހައްޓާފައި ހުރި ހަލާކުވެފައިވާ ދެގޮނޑިއެއް ވެސް ވަނީ ގެންގޮސްފައެެވެ.
ޖޯލިތަކާއި ގޮނޑިތައް ގެންދިއުމުން ފޭދޫގެ އެމްޑީޕީ މެންބަރުން މިރޭ އިދިކޮޅު ފަރާތްތަކުގެ ޖަލްސާ ބަލަން ތިބީ ބިންމަތީގައި ސަތަރި އަޅައިގެންނެވެ.
"ޖޯލި ނެގިއްޔާ ގޮނޑި އެބަހުރި. ގޮނޑި ނެގިއްޔާ މިހިރީ ސަތަރި. މި ނަގައިފިއްޔާ ބިންމަތީގައި އޮންނާނީ." ފޭދޫ އިން ވާހަކަ ދެއްކި އެމްޑީޕީ މެންބަރަކު ބުންޏެވެ.