ގާނޫނީ އިމުގެ ތެރެއިން ޖުމްހުރީ ޕާޓީގެ ލީޑަރ އަދި މާމިގިލީ ދާއިރާގެ މެމްބަރ ގާސިމް އިބްރާހިމް ސަލާމަތްތަވެވަޑައިގަންނަވާނެ ކަމަށް ތުލުސްދޫ ދާއިރާގެ މެމްބަރ އަދި މަޝްހޫރު ގާނޫނީ ވަކީލް މުހައްމަދު ވަހީދު (ލޯޔަރ ވައްޑެ) ވިދާޅުވެއްޖެއެވެ.
ވައްޑެ ވިދާޅުވީ ގާނޫނާއި ހިލާފްވާ ފަރާތްތަކާއި ގާނޫނު އަރާ ހަމަ ކުރާތަން ފެންނާނެ ކަމަށެވެ.
In shaa allaah,Qanoonee imugetherein hon.Qasim ibrahim salaamaiyve, Qaanoonaa khilaafvi faraaiy thakaa,Qaanoon araa hama kuraathan fennaane.
— Mohamed Waheed Ibrahim (@Lawyer_Waddey) April 22, 2017
ގާސިމް ހައްޔަރުކޮށް ދައުވާ އުފުލާފައިވަނީ މަޖްލިސްގެ ރައީސް އަބްދުﷲ މަސީހުގެ އިތުބާރު ނެތްކަމުގެ މައްސަލާގައި މަޖްލިސް މެމްބަރުންނަށް ރިޝްވަތު ދެއްވަން އުޅުއްވިކަމުގެ ތުހުމަތުގައެވެ.
ގާސިމް ހައްޔަރުކޮށްފައިވަނީ ރާއްޖޭގެ ގަނޫނާއި ހިލާފަށްކަމަށް އެމަނިކުފާންގެ ގާނޫނީ ވަކީލުންގެ ޓީމުން ބުނެފައިވާ އިރު ކުރީގެ ރައިސް އަދި ޕީޕީއެމްގެ އިންތިހާބީ ރައީސް އަލްއުސްތާޒު މައުމޫން އަބްދުލް ގައްޔޫމް ވިދާޅުވީ ގާނޫނު އަސާސީގައިވާ އުސޫލުން މީހަކު މަގާމުން ވަކިކުރަން މަސައްކަތް ކުރުމަކީ ކުށެއް ނަމަ، މީހަކު އިންތިހާބް ކުރުމަށް މަސައްކަތް ކުރުމަކީވެސް ކުށެއްކަމަށްވާނެކަމަށެވެ.
ގާސިމް ހައްޔަރު ކުރުމާއި ގުޅިގެން އެމަނިކުފާން ދޫކޮށްލުމަށް ރާއްޖޭގެ އެކިކަންކޮޅުތަކުން ދަނީ ގޮވަމުންނެވެ. އެގޮތުން މިއަދު ހަވީރު މާމިގިލީގައިވެސް ވަނީ ގާސިމް ދޫކޮށްލުމަށް ގޮވާލައި ބޮޑު މުޒާހަރާއެއް ބާއްވާފައެވެ.