މިދިޔަ ހޮނިހިރު ދުވަހުގެ ރޭ ކުއްލިއަކަށް އާސަންދައިގެ ޚިދުމަތް ލިބޭނީ ހަމައެކަނި ސަރުކާރު ހޮސްޕިޓަލުތަކާއި ސިއްހީ މަރުކަޒުތަކުން ކަމަށް ނިންމުމަށް ފަހު، ގިނަ ބައެއްގެ ފާޑު ކިޔުންތައް ސަރުކާރަށް އަމާޒުވުމުން އަނެއްކާ ވެސް ކުއްލިއަކަށް ކުރިއެކޭ އެއްގޮތަށް އެޚިދުމަތް އަލުން ދިނުމަށް ރައީސް އަބްދުﷲ ޔާމީން ނިންމަވައިފި އެވެ.
ރައީސް އޮފީހުގެ ސްޕޯކްސްޕާސަން އިބްރާހިމް މުއާޒް އަލީ މިއަދު ކުރެއްވި ޓުވީޓެއްގައި މިހެން ވިދާޅުވެފައިވީ ނަމަވެސް އާސަންދަ ކެނޑީ ކީއްވެގެން ކަމެއް ނުވަތަ ކުއްލިއަކަށް އެ ނިންމުން ބަދަލު ކުރީ ކީއްވެގެން ކަމެއް ވެސް ބުނެފައެއް ނުވެ އެވެ.
"ކުރިއެކޭ ވެސް އެއްގޮތަށް އާސަންދައިގެ ޚިދުމަތް ރައްޔިތުންނަށް ލިބޭ ގޮތަށް ބޭއްވުމަށް ރައީސުލްޖުމުހޫރިއްޔާ ނިންމަވައިފި،"
ވޯޓުން ސަރުކާރު ބަލިވުމުން އާސަންދައިގެ ޚިދުމަތް ކަނޑާލީ ކަމަށް ބައެއް އިދިކޮޅު ސިޔާސީ ފަރާތްތަކުން ބުނެފައިވާ އިރު ސަރުކާރުގެ އެ ނިންމުމަށް އިދިކޮޅު ފަރާތްތަކުން ވަނީ ވަރަށް ބޮޑަށް ފާޑުވިދާޅުވެފަ އެވެ.
"Kuriekey ves eggothah Aasandhaige khidhumaiy rayyithunnah libey gothah beyvvumah Raeesuljumhooriyyaa ninmavaifi" -im
— ɪʙʀᴀʜɪᴍ ᴍᴜᴀᴢ ᴀʟɪ (@SpokespersonMV) May 8, 2017
އާސަންދައަކީ ރައްޔިތުންގެ ވޯޓުން ދޭން ޖެހޭ އެއްޗެއް ނޫން ކަމަށާއި އެއީ ރައްޔިތުންގެ ފައިސާ އިން ރައްޔިތުންނަށް ފޯރުކޮށްދޭ ޚިދުމަތެއް ކަމަށް އިދިކޮޅު ފަރާތްތަކުން ވަނީ ބުނެފަ އެވެ.