ޔުރޮޕާ ލީގުގެ ފައިނަލުން އިންގްލެންޑުގެ މެންޗެސްޓާ ޔުނައިޓެޑާއި ނެދަލެންޑްސްގެ އަޔަކްސް އެމްސަޓަޑަމް އިން ޖާގަ ހޯދައިފި އެވެ.
އަޔެކްސް އިން ފައިނަލުގެ ޖާގަ އެއް ހޯދާފައި ވަނީ، ފްރާންސްގެ އޮލިމްޕިކް ލިއޯންގެ މައްޗަށް ދެ ލެގުގެ އެގްރިގޭޓުން 5-4 އިން ކުރި ހޯދައިގެންނެވެ.
ރޭ ކުޅުނު ސެމީގެ 2 ވަނަ ލެގުން އަޔެކްސް ބަލިވީ 3-1 އިންނެވެ. ނަމަވެސް އަޔެކްސްގެ އަމިއްލަ ދަނޑުގައި ކުޅުނު ސެމީގެ ފުރަތަމަ ލެގު އެ ޓީމުން ކާމިޔާބުކޮށްފައިވަނީ 4-1 އިންނެވެ.
މެންޗަސްޓާރ ޔުނައިޓެޑުން ފައިނަލުން ފުރުސަތު ހޯދީ ސެމީ ފައިނަލުގެ ދެ ވަނަ ލެގުގައި ރޭ އަމިއްލަ ދަނޑުގައި ސްޕެއިނުގެ ސެލްޓާ ވީގޯއާ 1-1 އިން އެއްވަރުވި ނަމަވެސް ދެ ލެގުގެ އެގްރިގޭޓުން 2-1 އިން ކުރި ހޯދައިގެންނެވެ.
ސެލްޓާވީގޯއާގެ ދަނޑުގައި ކުޅުނު ފުރަތަމަ ލެގު ޔުނައިޓެޑް ކާމިޔާބުކުރީ 1-0 އިންނެވެ.
މެންޗަސްޓަރ ޔުނައިޓެޑަށް މިހާތަނަށް ޔޫރޮޕާ ލީގު ކާމިޔާބު ކުރެވިފައެއްނުވެއެވެ. އެ ޓީމުން މިފަހަރުގެ މުބާރާތް ކާމިޔާބުކޮށްފިނަމަ އަންނަ ސީޒަނުގެ ޗެމްޕިއަންސް ލީގަށް ކޮލިފައިވާނެއެވެ.
އިނގިރޭސި ޕްރިމިއާ ލީގުގެ 6 ވަނައިގައި އޮތް ޔުނައިޓެޑަށް ލީގުގެ ގަދަ ހަތަރަކަށް އެރުމަށް އޮތީ ހަނި ފުރުސަތެކެވެ.
ޔޫރޮޕާ ލީގުގެ ފައިނަލް މެޗު އޮންނާނީ މި މަހުގެ 24 ވަނަ ދުވަހުގެރޭ ސްވިޑަންގެ ސްޓޮހޯމްގަ އެވެ.