ބަނގުރާ ބުއިމުގެ ކުށް ސާބިތުވި މީހަކު 27 ދުވަހުގެ މުއްދަތަކަށް ޖަލަށް ލުމަށާއި 40 އެތިފަހަރު ދުއްރާއިން ތެޅުމަށް ކްރިމިނަލް ކޯޓުން ހުކުމްކޮށްފިއެވެ.
ބަނގުރާ ބުއިކަމުގެ ކުށް ސާބިތުވެފައިވެ ކްރިމިނަލް ކޯޓުން ހުކުމް އިއްވާފައި ވަނީ ލ.މާބައިދޫ. ސަބުނަމްހައުސް ޙުސައިން ޝަހުބާންގެ މައްޗަށެވެ.
ކްރިމިނަލް ކޯޓުގެ ހުކުމްގައި ބުނެފައިވާ ގޮތުން ޝަހުބާން ވަނީ ޝަރީޢާތުގެ މަޖިލީހުގައި ކުށަށް އިއުތިރާފްވެފައެވެ.
ފާއިތުވި އޭޕްރީލް މަހުގެ 27 ވަނަ ދުވަހު ކްރިމިނަލް ކޯޓުން ޝަހުބާންގެ މައްޗަށް އިއްވި ހުކުމް ތަންފީޒުކުރި ކަމެއް ނުވަތަ ނޫންކަމެއް އަދި ވަނީ ސާފުވާގޮތް ނުވެފައެވެ.
2016 ވަނަ އަހަރުގެ ތެރޭގައި ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަން (ޑީޖީއޭ) އިން ރާއްޖޭގެ ކޯޓުތަކުގައި ބޭނުން ކުރުމަށް 20 ދުއްރަ ހޯދަން އިއުލާން ކުރިއެވެ. އޭރު ޑީޖޭއޭ އިން ކުރި އިއުލާނުގައި ބުނެފައިވާ ގޮތުން "ދުއްރައިގެ ލެދާ އިން ހަދާބައިގެ، ލެދާގެ އެތެރެއަށް ދެ ކީސްތިލަ ލައްވާފައި، އެއް ކީސް ތިލަ މުއްގަނޑާ ހަމައަށް ހުރުން އަދި އަނެއް ތިލަ މެދުގެ ހަންފަށަލައިގެ ދެ ފަރާތަށް ލައްވާފައި ހުންނަން" ޖެހޭނެއެވެ.