އަބުރު ރައްކާތެރި ކުރުމުގެ ގާނޫނުގެ ދަށުން ރާއްޖޭގެ ބައެއް މީޑިއާ ތަކުގެ މައްސަލަ މޯލްޑިވްސް މީޑިއާ ކައުންސިލަށް ރައީސު އޮފީހުން ހުށަހަޅައިފި އެވެ.
މައުލޫމާތު ލިބިފައިވާ ގޮތުގައި ރައީސު އޮފީހުން މީޑިއާ ކައުންސިލަށް މައްސަލަ ހުށަހަޅާފައިވާ މީޑިއާ ތަކުގެ ތެރޭގައި ރާއްޖެޓީވީން ހިންގަމުން އަންނަ ރާއްޖެއެމްވީ އާއި ވީއެފްޕީ، މިހާރު ނޫސް އަދި ވަގުތު އަދި މޯލްޑިވްސް އިންޑިޕެންޑެންޓް ހިމެނެއެވެ.
މޯލްޑިވްސް މީޑިއާ ކައުންސިލްގެ ރައީސް އަބްދުލް މުއީދުވެސް ވަނީ ގިނަ މީޑިއާ ތަކުގެ މައްސަލަ ހުށަހަޅާފައިވާ ކަން ޔަގީންކޮށްދެއްވާފައެވެ.
ރައީސު އޮފީހުންވަނީ ރާއްޖެޓީވީ އަދި ރާއްޖެއެމްވީގެ ހަ ނޫސްވެރިންގެ މައްސަލަ މީޑިއާ ކައުންސިލަށް ހުށަހަޅާފައެވެ. ރައީސް އޮފީހުގެ ޗީފް ކޮމިއުނިކޭޝަން އޮފިސަރގެ ނަމުގައި ވަކިވަކިން ހުށަހަޅާފައިވާ މައްސަލަތަކަކީ ރައީސްގެ އަނބިކަބަލުން މެޑަމް ފާޠުންގެ އަބުރަށް އަރައިގެންފައިވާކަމަށް ބުނެ ހުށަހަޅާފައިވާ މައްސަލަތަކެވެ.
މީޑިއާ ކައުންސިލުން ވަނީ ރާއްޖެ ޓީވީ އަދި ރާއްޖެއެމްވީގެ ހަ ނޫސްވެރިންނަށް ޖަވާބުދާރީވާން 7 ދުވަހުގެ މުއްދަތެއް ދީފައެވެ.