މީހަކު ޓީވީގައި ދެއްކި ވާހަކައަކާ ގުޅިގެން ތަހްގީގު ކުރުމަށް ޖަލަށްލާފައި ބަހައްޓާކަށް ނުޖެހޭ ކަމަށް މަޝްހޫރު ގާނޫނީ ވަކީލް ހުސްނުއް ސުއޫދު ވިދާޅުވެއްޖެ އެވެ.
ސުއޫދު މިހެން ވިދާޅުވީ ކުރީގެ ޑިފެންސް މިނިސްޓަރ ކާނަލް މުހައްމަދު ނާޒިމްގެ ކޮއްކޮ އަދި އެސްޓިއޯގެ ކުރީގެ މެނޭޖިން ޑިރެކްޓަރު އާދަމް އާޒިމް ފުލުހުންގެ ބެލުމުގެ ދަށުގައި ބަހައްޓައިގެން ތަހްގީގު ކުރަމުންދާ މައްސަލައަކީ "ސަންގު ޓީވީ" ގައި އާޒިމް ދެއްކެވި ވާހަކަތަކަކާއި ގުޅިގެން ކަމަށް އޭނާގެ ވަކީލުން ބުނުމާއި ގުޅިގެން ކުރެއްވި ޓްވީޓެއްގަ އެވެ.
TV gai dhekki vaahaka aa gulhigen thahugeegu kuran jalah laafa bahattan nujehey https://t.co/fSkBogQhDv
— Husnu Al Suood (@hsuood) June 12, 2017
ގާނޫނީ ސަރުކާރު ވައްޓާލުމަށާއި ރާއްޖޭގެ ޝަރުއީ ނިޒާމްގެ އިތުބާރު ގެއްލޭގޮތަށް އާޒިމް މަސައްކަތް ކުރައްވަމުންދާ ކަމުގެ ތުހުމަތުގައި އާޒިމް ހައްޔަރުކޮށް ބަންދުގައި ބަހައްޓަން 6 ދުވަސް ވަނީ ޖަހާފައެވެ.
އާޒިމްގެ ގާނޫނީ ވަކީލް އަލީ ޒާހިރު ވިދާޅުވީ އާޒިމް އާއި ފުލުހުން ސުވާލު ކުރަނީ "ސަންގު ޓީވީ" ގައި ދެއްކެވި ވާަހަކަ ތަކަކާއި ގުޅިގެން ކަމަށެވެ.
އަލީ ޒާހިރު ވިދާޅުވީ އާޒިމަށް ތުހުމަތުކުރަނީ ގާނޫނުލް އުގޫބާތުގެ 532، 533 އަދި 610 ވަނަ މާއްދާގެ ދަށުންނެވެ. ގާނޫނުލް އުގޫބާތުގެ 610 ވަނަ މާއްދާގެ ދަށުން ތުހުމަތުކުރީ ފަހުން މި ތަހުގީގުގައި ކަމަށް ވެސް އޭނާ ވިދާޅުވި އެވެ.