ރާއްޖޭގައި މަސްވެރިކަން ކުރިއެރުވުމަށް ސަރުކާރުން ކުރާ މަސައްކަތުގައި މިއަހަރު ނިމުމުގެ ކުރިން ބައެއް ދޯނިފަހަރުގައި މަސް ފިނި ކުރާ ނިޒާމު ގާއިމު ކުރެވޭނެ ކަމަށް ފިޝެރީޒް މިނިސްޓަރު، ޑރ. ޝައިނީ ވިދާޅުވެއްޖެއެވެ.
މިނިސްޓަރު މިއަދު ކުރެއްވި ޓުވީޓެއްގައި ވިދާޅުވެފައިވަނީ މި މަސައްކަތް ކުރުމަށް އައިސްލޭންޑުގެ ކުންފުންޏަކާ މަޝްވަރާ ކުރަމުންދާ ކަމަށާއި އުއްމީދަކީ މިއަހަރު ނިމެންވާއިރަށް މި ނިޒާމު ގާއިމުކުރެވިފައިވާ ދޯނި ތަކުގައި ދިވެހިން މަސްވެރިކަން ކުރުމަށް ކަމަށެވެ.
Masdhonifaharuga masfinikura nizam bahattan Iceland ge kunfunyaka mashvara kurany. IA, mi aharutherey baeiy dhoni faharuga behetteyne. pic.twitter.com/52iSFiFnCJ
— Mohamed Shainee (@mshainee) July 31, 2017
ރައީސް ޔާމީން 2013 ވަނަ އަހަރުގެ ރިޔާސީ އިންތިޚާބުގެ ކުރިން ކުރެއްވި ކެމްޕޭނުގައި މަސްވެރިންނަށް ބޮޑެތި ވައުދުތަކެއް ވެފައިވާއިރު އެއިން ގިނަ ވައުދުތަކެއް ދައުރު ނިމެން ކައިރިވެފައިވާއިރުވެސް ނުފުއްދޭ ކަމަށް ބުނެ މަސްވެރިންގެ ފާޑުކިޔުންތައް ދޭތެރެ ދޭތެރެއިން ޝައިނީއަށް އަމާޒުވެއެވެ.
ދާދި ފަހުންވެސް ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތޯރިގް(ޓޮމް) ވަނީ މިނިސްޓަރު ޝައިނީއަށް ވަރަށް ބޮޑަށް ފާޑުވިދާޅުވެފައެވެ. ޓޮމް ވަނީ މިސަރުކާރުން މަސްވެރިންނަށް ކުރި ވައުދުތައް ފުއްދައި ނުދެވޭތީ ކަމަށްބުނެ ޕީޕީއެމަށް ކުރަމުން އައި ތާއީދުވެސް އަނބުރާ ގެންގޮސްފައެވެ.