ޖުމްހުރީ ޕާޓީގެ ލީޑަރު އަދި ރައްޔިތުންގެ މަޖިލީހުގެ މާމިގިލީ ދާއިރާގެ މެމްބަރު ގާސިމް އިބްރާހިމްގެ މައްޗަށް އުފުލާފައިވާ ރައްޔިތުންގެ މަޖިލީހުގެ މެމްބަރުންނަށް ރިޝްވަތު ދެއްވިކަމުގެ ތުހުމަތުގެ ދައުވާގެ މިއަދުގެ ޝަރީއަތްވެސް ސިއްރު ކުރަން ކްރިމިނަލް ކޯޓުން ނިންމައިފި އެވެ.
ގާސިމްގެ ޝަރީއަތް މިއަދު ތާވަލްކޮށްފައި ވަނީ މެންދުރު 1:30 އަށެވެ.
ޤާސިމްގެ މައްޗަށް ދައުލަތުން ތިން ދައުވާއެއް ވަނީ އުފުލާފައެވެ. އެގޮތުން މަޖްލިސް މެމްބަރުންނަށް ރިޝްވަތު ހުށަހެޅުއްވި ކަމުގެ ތުހުމަތުގެ ދައުވާގެ އަޑުއެހުމެއް އެންމެ ފަހުން އަޑުއެހުމެއް ބާއްވާފައި ވަނީ މި ޖުލައިމަހުގެ 25 ވަނަ ދުވަހުއެވެ. މިގޮތުން އެދުވަހުގެ އަޑުއެހުމުގައި ވަނީ ވަކީލަކު އައްޔަނު ކުރުމަށް ޤާސިމް އިބުރާހިމަށް 10 ގަޑިއެއްހާއިރުގެ ފުރުސަތެއްދީ 25 ވަނަ ދުވަހުގެ ރޭ އިތުރު އަޑުއެހުމެއް ބޭއްވުމަށް ނިންމާފައެވެ. އެހެން ނަމަވެސް އެ ރޭ ބާއްވަން ތާވަލުކުރި އަޑުއެހުން ޤާސިމް އިބުރާހިމްގެ ސިއްޙީ ހާލުކޮޅު ހުރިގޮތުން ވަނީ އެމަނިކުފާނު ކޯޓަށް ހާޞިރު ކުރިފަހުން ކެންސަލްކޮށްފައެވެ.
ގާސިމްގެ މައްޗަށް އުފުލާފައިވާ ދައުވާ މީގެ ކުރިން ކްރިމިނަލް ކޯޓުން ވަނީ ބޭރުކޮށްފައެވެ. ޕްރޮސެކިއުޓަރ ޖެނެރަލްގެ ފަރާތުން ޝަރީއަތް މަޖްލިސްއަށް ހާޒިރު ނުވުމުން އެ މައްސަލަ ވަނީ ކޯޓުން ބޭރުކޮށްލާފައެވެ. ނަމަވެސް ދެވަނަ ފަހަރަށް ޕީޖީން މައްސަލަ ކޯޓަށް ހުށަހެޅުމުން ކުރީގެ ޝަރީއަތް ހުއްޓާލި ހިސާބުން އަނެއްކާވެސް މިވަނީ ޝަރީއަތް ފަށާފައެވެ