ފުލުހުން ހިންގި އޮޕަރޭޝަނެއްގައި މާލޭގެ ގެއެއް ބަލައިފާސްކޮށް ގިނަ އަދަދެއްގެ މަސްތުވާތަކެތި ހޯދައި ބިދޭސީއަކު ފުލުހުންގެ ބެލުމުގެ ދަށަށް ގެންގޮސްފި އެވެ.
އެގޮތުން ފުލުހުންގެ އިންޓެލިޖެންސަށް ލިބުނު މަޢުލޫމާތަކާއި ގުޅިގެން ޑްރަގް އެންފޯސްމަންޓް ޑިޕާޓްމަންޓުން ހިންގި އެ އޮޕަރޭޝަނުގައި، އޮގަސްޓް މަހުގެ 5 ވަނަ ދުވަހުގެރޭ ވަނީ 24 އަހަރުގެ ބަންގްލަދޭޝްގެ ފިރިހެނަކު ހައްޔަރު ކޮށްފައެވެ.
އެ އޮޕަރޭޝަނުގައި ކޯޓް އަމުރެއްގެ ދަށުން މާފަންނު ގެއެއް ބަލައިފާސްކުރުމުން ވަނީ ކެނެބިސްކަމަށް ބެލެވޭ އެއްޗެއް ހުރި ބޮޑު ދެ ރަބަރު ޕެކެޓާއި، 2 ޖޫސްޕެޓީ ކޮތަޅާއި ދަތްކޮށްޓާ އިލޮށި ދަޅެއް ފެނިފައެވެ. އެތަކެތީގެ ބަރުދަނުގައި 1 ކިލޯ 226 ގްރާމް ހުރި ކަމަށް ބެލެވޭއިރު، އެގެއިން ވަނީ ހެރޮއިން ކަމަށް ބެލެވޭ 2 ޖޫސްޕެޓީ ކޮތަޅާއި ތިން ރަބަރު ޕެކެޓް ވެސް ހޯދާފައެވެ. އެތަކެތީގައި ބަރުދަނުގައި 188 ގްރާމް ހުރި ކަމަށް ފުލުހުން ބުނެއެވެ.
އެ މައްސަލަ ފުލުހުން ދަނީ އިތުރަށް ތަހުޤީގު ކުރަމުންނެވެ.