ވީނުވީއެއް ނޭގި ގެއްލިފައިވާ މިނިވަން ނޫހުގެ ނޫސްވެރިޔާ އަހްމަދު ރިލްވާންގެ ހަނދާނުގައި މިމަހުގެ 8 ވަނ ދުވަހު މާލޭގައި ބޭއްވި ހިނގާލުމުގައި ބައިވެރިވި ފުލުހުންގެ ސިވިލް މަގާމުގައި ތިބި ދެމީހަކު ވަޒީފާއިން ވަކިކޮށްފިއެވެ.
މައުލޫމާތު ލިބިފައިވާ ގޮތުގައި ފުލުހުންގެ ސިވިލް ވަޒީފާއިން ވަކިކޮށްފައިވަނީ ގެއްލިފައިވާ ނޫސްވެރިޔާ ރިލްވާންގެ ކޮއްކޮ އަހްމަދު ޖޫޒީން އާއި މަރާލާފައިވާ ޒުވާން ބްލޮގަރ ޔާމީން ރަޝީދުގެ ކޮއްކޮ އާއިޝާ ރަޝީދުއެވެ.
ރިލްވާންއަށް ވީނުވީއެއް ނޭގި ގެއްލިފައިވާތާ 3 އަހަރުވަނީ ވެފައެވެ. ރިލްވާންގެ ހަނދާނުގައި ބޭއްވި "ސުވާލު މާޗް" ހިނގާލުން ފުލުހުންވަނީ ޕެޕަރ ސްޕްރޭ ޖަހައި ހުއްޓުވާފައެވެ. އެހިނގާލުމުގެ ތެރެއިން ގަލޮޅު ދެކުނު ދާއިރާގެ މެމްބަރ މަހްލޫފް އާއި މެދު ހެންވޭރު ދާއިރާގެ މެމްބަރ އަލީ އާޒިމް ވެސް ފުލުހުން ހައްޔަރުކުރިއެވެ. ނަމަވެސް ފަހުން ވަނީ ދޫކޮށްލާފައެވެ.