ޖުމްހޫރީ ޕާޓީގެ ލީޑަރު ކަމަށްވާ ޤާސިމް އިބްރާިމްގެ ޝަރީޢަތް ރޭ ކްރިމިނަލް ކޯޓްގައި ކުރިއަށް ދިޔަ ވަގުތު، އެ ސަރަޙައްދުން ހައްޔަރު ކުރި ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރު އަހްމަދު މަހުލޫފު މިއަދު ދޫކޮށްލައިފި އެވެ.
ފުލުހުންގެ މީޑިއާ އޮފިޝަލް ވިދާޅުވީ މަހްލޫފް ފުލުހުންގެ ބެލުމުގެ ދަށައް ގެންގޮސްފައިވަނީ ފުލުހުންގެ އަމުރަށް ނުކިޔަމަންތެރިވެގެން ކަމަށެވެ. އެއަށްފަހު މަހްލޫފް އާއި ރޭ ހައްޔަރުކުރި އެހެން ހައްޔަރީން ދޫނިދޫއަށް ވަނީ ގެންގޮސްފައެވެ.
މަހުލޫފް މިއަދު ދޫކޮށްލީ އޭނާގެ ބަންދާއިމެދު ގޮތެއް ނިންމުމަށް މިއަދު މެންދުރު ކްރިމިނަލް ކޯޓަށް ގެންދިއުމުން، އެއްވެސް ޝަރުތަކާއި ނުލައެވެ.
ރޭ ހައްޔަރުކުރި އެހެން މީހަކު ވެސް ކްރިމިނަލް ކޯޓުން ވަނީ އިތުރު ޝަރުތަކާއި ނުލައި ދޫކޮށްލާފައެވެ.