ކޯޓު އަމުރެއްގެ ދަށުން ނޮޅިވަރަންފަރު ދާއިރާގެ މެމްބަރ ހުސެއިން އަރީފްގެ ފާސްޕޯޓް ދެވަނަ ފަހަރަށް ހިފަހައްޓައިފިއެވެ.
އަރީފްގެ ޕާސްޕޯޓް ހިފެހެއްޓީ އިއްޔެ ކްރިމިނަލް ކޯޓުގެ ގާޒީ އަލީ އާދަމް ނެރުއްވި އަމުރެއްގެ ދަށުންނެވެ. އެ އަމުރުގައި ބުނެފައިވަނީ އޮކްޓޫބަރ 2 ވަނަ ދުވަހުން ފެށިގެން ނޮވެމްބަރ މަހުގެ 1 ވަނަ ދުވަހާއި ހަމައަށް ޕާސްޕޯޓް ހިފެހެއްޓުމަށެވެ.
ޖުލައި މަހުގެ 31 ވަނަ ދުވަހު ރައްޔިތުންގެ މަޖިލީހުގެ އިދާރާގައި މަޖްލިސްގެ ރައީސްގެ ހިމާޔަތުގައި ތިބި ސަލާމަތީ ބާރުތަކުގެ އޮފިސަރުންނަށް ހަމަލާދެއްވި ކަމުގެ ތުހުމަތުގައި އަރީފްގެ ޕާސްޕޯޓް ފުރަތަމަ ހިފެހެއްޓީ އޮގަސްޓް 2 ވަނަ ދުވަހުއެވެ.
އަރީފް ވިދާޅުވީ ފިއްލަވައިގެން ރާއްޖެ ދޫކޮށް އެއްވެސް ގައުމަކަށް ވަޑައިނުގަންނަވާނެކަމަށެވެ. އަދި އަބަދުވެސް ހުންނަވާނީ ދިވެހިންނާއި އެކު ރާއްޖޭގައި ކަމަށެވެ.
އަރީފްގެ މައްސަލަ ފުލުހުން ގެންދަނީ ތަހްގީގު ކުރަމުންނެވެ.