އިދިކޮޅު ފަރާތްތަކުން އަންނަ ރިޔަސީ އިންތިހާބްގައި އިންތިގާލީ ކެންޑިޑޭޓެއް ނެރުމަށް މަޝްވަރާ ކުރަމުންދާކަން އިއްލާން ކޮށްފައިވަނިކޮށް އެ ކެންޑިޑޭޓަކީ ކުރީގެ އިލެކްޝަން ކަމިޝަންގެ ރައީސް ފުއާދު ތައުފީގުކަމަށް ވިދާޅުވެ ޕީޕީއެމްގެ ޕާލިމެންޓްރީ ގްރޫޕްގެ ލީޑަރ އަހްމަދު ނިހާން ހަސަން މަނިކު ޓްވީޓްކޮށްފިއެވެ.
ނިހާން މިއަދު ކުރެއްވި ޓްވީޓްގައި ވިދާޅުވީ ރައިސް ނަޝީދު އާއި އަހްމަދު މަހްލޫފް އެމްއޯޔޫގެ ނަމުގައި ބެމްބޫ ހައްދައިގެން ނެރޭ އިންތިގާލީ ކެންޑިޑޭޓަކީ ފުއާދު ތައުފީގު ކަމަށެވެ. ނިހާން ވަނީ މިޓްވީޓްގައި ރައީސް ނަޝީދު އަދި މަހްލޫފް އާއި އެކު ފުއާދު ހުންނަވަނިކޮށް ނަގާފައިވާ ފޮޓޯ ޓްވީޓްކޮށްފައެވެ.
#BRK @MohamedNasheed aai @AhmedMahloof #MOU ge Namugai Benbooo Hadhaigen Nerey 2018 ge Inthigaalee Candidate akee @FuadThaufeeq pic.twitter.com/lLEbWgzNn7
— Ahmed Nihan (@ahmed_nihan) October 23, 2017
ރޭ ރާއްޖެ ޓީވީ ފަލަ ސުރުހީގައި ވާހަކަފުޅު ދައްކަވަމުން މަހްލޫފް ވިދާޅުވެފައިވަނީ ގައުމަށް އެންމެ ފައިދާ ހުރި ގޮތަކީ އިދިކޮޅުން އެއް ކެނޑިޑޭޓެއް ނެރުން ކަމަށެވެ. އަދި އެގޮތަށް ނެރޭ ކެންޑިޑޭޓަކީ މާ ސިޔާސީ ނޫން ކެންޑިޑޭޓަކަށްވެސް ވެދާނެކަމަށެވެ.
ނިހާން މިފަދައިން ޓްވީޓް ކުރެއްވި އިރު ޕީޕީއެމްއިން ދަނީ އިންތިގާލީ ވެރިއަކަށް ރާއްޖޭގެ ގާނޫނު އަސާސީން ފުރުސަތެއް ނެތްކަމަށް ބުނެ ވާހަކަ ދައްކަމުންނެވެ.