މިއަދު ހެނދުނު ގއ. ވިލިނގިލީގައި ދެ ސައިކަލް ޖެހި ހިނގި އެކްސިޑެންޓްގައި ސީރިއަސް އަނިޔާ ލިބުނު ޒުވާނާ އިތުރު ފަރުވާއަށް މާލެ ގެންދިއުމުގެ މަސައްކަތް ކުރަމުން އަންނަކަމަށްގއ. އަތޮޅު ހޮސްޕިޓަލުން ބުނެފިއެވެ.
ހޮސްޕިޓަލްގެ މެނޭޖަރ ނަޒްލީން ނަޖީބް ވިދާޅުވީ އެކްސިޑެންޓް ވެގެން 32 އަހަރުގެ ޒުވާނަކާއި 19 އަހަރުގެ ޒުވާނަކަށް ފަރުވާ ދެމުން އަންނަ ކަމަށެވެ. އަދި އޭގެ ތެރެއިން 19 އަހަރުގެ ޒުވާނާއަށް ސީރިއަސް އަނިޔާވެފައިވާތީ ސީޓީ ސްކޭން ހެދުމަށް މާލެ ގެންދިއުމަށް މަސައްކަތް ކުރަމުން އަންނަ ކަމަށެވެ.
ނަޒްލީން ވިދާޅުވީ އެޒުވާނާގެ ބޭރުފުށުން ގެއްލުމެއް ފެންނަން ނެތަސް ލޯ ކައިރިން ފުން ޒަހަމްތަކެއް ހުރި ކަމަށެވެ.
ވިލިނގިލީ ބޮޑު މަގުގައި ހިނގި މި އެކްސިޑެންޓްގައި ދެ ސައިކަލަށްވެސް ވަނީ ބޮޑެތި ގެއްލުން ވެފައެވެ. އެކްސިޑެންޓް ހިނގާފައިވަނީ ތާރު އަޅައިގެން ރަނގަޅު ފެންވަރަކަށް ހަދާފައިވާ އެރަށު ބޮޑު މަގުގައެވެ.