މުރަކަތަކާއި ފަރުތަކަކީ މާތްﷲ އަޅުގަނޑުމެންނަށް ދެއްވާފައިވާ ގުދުރަތީ ނިއުމަތެއް ކަމަށާއި އެ ނިއުމަތް ހަލާކުނުކުރުމަށް ކުރީގެ ރައީސް މައުމޫން އަބްދުލްޤައްޔޫމް ގޮވާލައިފިއެވެ.
ރައީސް މައުމޫން މިއަދު ކުރެއްވި ޓުވީޓެއްގައި ވިދާޅުވެފައިވަނީ މުރަކަތައް ނެތިކޮށްލުމަށްފަހު ގެނެވެނީ ތަރައްގީއެއް ނޫން ކަމަށާއި އެއީ އަލިފާނާއި ކުޅުން ކަމަށެވެ.
Our coral reefs are a blessing from Allah. They protect us from all manner of environmental problems. We must never destroy them. 1/2
— Maumoon Abdul Gayoom (@maumoonagayoom) November 20, 2017
މުރަކަތަކަކީ ގުދުރަތީ ގޮތުން ލިބޭ ގެއްލުންތަކުން ރަށްތައް ސަލާމަތްކޮށްދޭ ފައުޖެއް ކަމަށްވެސް މައުމޫން ވިދާޅުވެ، މުރަކަތައް ހިމާޔަތް ކުރުމަށް މިއަދު ގޮވާލާފައިވެއެވެ.
Progress achieved by destroying them is no progress at all. But sheer shortsightedness and playing with fire. 2/2
— Maumoon Abdul Gayoom (@maumoonagayoom) November 20, 2017
ދިވެހި ރާއްޖެއަކީ ގުދުރަތީ ގޮތުން މިފަދަ ވަރަށް ބޮޑު މުއްސަނދި ކަމެއް ލިބިފައި އޮންނަ ގައުމެކެވެ. ކަނޑުގެ ބިޔަ ރާޅުތަކުންނާއި އުދަ އެރުމުން ރަށްތައް ސަލާމަތްކޮށްދޭ ޑިފެންސް ފޯހަކީ ފަރުތަކެވެ. ފަރުތަކުގެ ދިރުމަކީ މުރަކަތަކެވެ. އެހެންކަމުން ފަރު ގޮއްވުމާއި މުރަކަތައް ހަލާކުނުކުރުމަށް ތިމާވެށީގެ މާހިރުން އަބަދުވެސް ބުނަމުންދެއެވެ.
ކުޅުދުއްފުށީގައި އެއާޕޯޓު އެޅުމަށް އެރަށު ކުޅި ހިއްކުމަށް ސަރުކާރުން ނިންމުމުން، އޭގެ ސަބަބުން ތިމާވެއްޓަށް ކުރާނެ ނޭދެވޭ އަސަރުތަކުގެ ވާހަކަ ބަޔާންކޮށް އެތައް ބަޔަކު ވަނީ އަޑުއުފުލާފައެވެ. ނަމަވެސް ސަރުކާރުން ވަނީ ކުޅި ހިއްކުމުގެ މަސައްކަތް ފަށާފައެވެ.
އައްޑޫ ސިޓީގެ މީދޫ ނެރު ކެނޑުމަށް ފަރު ގޮއްވުމާ ދެކޮޅަށްވެސް އެތައް ބަޔަކު ތެދުވެ އަޑު އުފުލާފައިވަނިކޮށް މިސަރުކާރުން ވަނީ އެކަންވެސް ކޮށްފައެވެ. ސަރުކާރުން އޭރު ބުނެފައިވަނީ އެކަން ކޮށްފައިވަނީ އެނޫން އިތުރު އެއްވެސް ގޮތެއް ނެތިގެން ކަމަށެވެ.