ނެޝަނަލް އިންޓަގްރިޓީ ކޮމިޝަން (އެންއައިސީ)ގެ ރައީސް ކަމުން ޔޫސުފް މާނިއު މުހައްމަދު ވަކިކުރުމަށް ނިންމާފައިވާކަން އިތުބާރު ހުރި ގޮތެއްގައި 'އައްޑޫލައިވް' އަށް އެނގިއްޖެއެވެ.
ރައީސް އޮފީހުގެ އޮފިޝަލަކު ވިދާޅުވި ގޮތުގައި، މާނިއު ވަކިކުރުމަށް ނިންމާފައިވަނީ މަގާމުގެ މަސްއޫލިއްޔަތު އަދާނުކުރެވޭތީ ކަމަށާއި އެކަން ވަރަށް އަވަހަށް ރައީސް އޮފީހުން ރަސްމީކޮށް އިއުލާން ކުރާނެ ކަމަށެވެ.
އިންޓެގްރިޓީ ކޮމިޝަންގެ ގާނޫނުގައިވާ ގޮތުން އެ ކޮމިޝަންގެ ރައީސް މަގާމަށް އައްޔަންކޮށް ވަކިކުރާނީ ރައީސުލްޖުމްހޫރިއްޔާ އެވެ. އެކަމަކު ކޮމިޝަންގެ ނައިބު ރައީސް އައްޔަން ކުރާނީ އެ ކޮމިޝަންގެ މެމްބަރުންގެ ތެރޭގައި ނަގާ ވޯޓަކުންނެވެ.
އެންއައިސީގެ ރައީސް ކަމުން މާނިއު ވަކިކުރުމަށް ނިންމާފައި މިވަނީ އެންއައިސީގެ ތަހުގީގުތަކަށް ފުލުހުންގެ ބައެއް އިސްވެރިން ހުރަސް އަޅާކަމަށް ތުހުމަތުކޮށް ޓްވީޓްތަކެއް ކޮށްފައިވާ ދަނޑިވަޅެއްގައެވެ.
ނޮވެމްބަރު މަހުގެ 18 ވަނަ ދުވަހު ޔޫސުފް މާނިއު ކުރެއްވި ޓްވީޓެއްގައި ވިދާޅުވެފައިވަނީ، ކޮމިޝަނުގެ ތަހުގީގުތަކަށް ހުރަސް އަޅާ ފުލުހުންގެ ލީޑާޝިޕާ މެދު ވެސް އެންއައިސީ އަށް ލިބިފައިވާ ގާނޫނުގެ ބާރު ހިފާނެ ކަމަށެވެ.
Time for diplomacy is over those even in @PoliceMv leadership who obstruct our investigations will face the full legal power of NIC. We will succeed in protecting INNOCENT civilians and police officers as well. Allah Bless.
— Maaniu (@yoosufmaaniu) November 18, 2017
ފުލުހުންގެ އިދާރާއިން ތަހުގީގުތަކަށް އެއްބާރުލުން ނުލިބޭކަން ފާހަގަކުރައްވައި މާނިއު ވިދާޅުވެފައިވަނީ އެހެން ހުރިހާ ތަނަކުން ވެސް މައްސަލަތައް ބެލުމަށް އެ ކޮމިޝަނަށް އެއްބާރުލުން ދޭ ކަމަށެވެ.