ދެކުނުއިރުމަތީ ނައިޖީރިއާގެ މާރުކޭޓަކަށް ހޮނިހިރު ދުވަހުގެ ހެނދުނު ޖާނުން ފިދާވެގެން ދިން ބޮމުގެ ދެ ހަމަލާއެއްގައި މަދުވެގެން 13 މީހުން މަރުވެ، އިތުރު 50 މީހަކު އަނިޔާވެއްޖެ އެވެ.
މި ހަމަލާތައް ދީފައި ވަނީ ބޯނޯ ސްޓޭޓްގެ ވެރިރަށް މެއިޑުގުރީގެ ދެކުނުން 115 މޭލު ދުރުގައި އޮންނަ ރަށެއް ކަމުގައިވާ ބިއު އަށެވެ. ފުލުހުންގެ ތަރުޖަމާނަކު ބުނެފައިވާ ގޮތުގައި ދެ އަންހެނުން ވަނީ ބިއު އަށް ވަދެފައި ކަމަށާއި، އޭގެ ތެރެއިން އެކަކު ވަނީ އޭނާގެ ގައިގައި ހަރުކޮށްފައިހުރި އައިއީޑީ (އިމްޕްރޮވައިޒްޑް އެކްސްޕްލޯސިވް ޑިވައިސް) މާރުކޭޓުގެ މެދުގައި ހުރެގެން އެކްޓިވޭޓް ކޮށްފައި ކަމަށާއި އަނެކަކު ވަނީ މާރުކޭޓުގެ ބޭރުގައި އޭނާގެ ގައިގައި ހަރުކޮށްފައި ހުރި ބޮން އެކްޓިވޭޓް ކޮށްފައި ކަމަށެވެ.
މި ހަމަލާގެ ޒިންމާ މިހާތަނަށް އެއްވެސް ގްރޫޕަކުން ނަގާފައި ނުވާއިރު، މީގެ ކުރިންވެސް ބޯކޯ ހަރަމް ގްރޫޕުން ވަނީ އަންހެނުންނާއި ކުޑަކުދިން ބޭނުންކޮށްގެން އެ ސަރަޙައްދުގައި ޖާނުން ފިދާވުމުގެ ހަމަލާތައް ކުރިއަށް ގެންގޮސްފައެވެ.