މީގެ ކުރިން މާލޭގެ ގާކޮށްޓާއި އަރަބިއްޔާ ސްކޫލް ހިންގި ބިމުގައި އިންޑިއާގެ ޓާޓާ ކުންފުނިން އިމާރާތް ކުރި ފްލެޓްތަކަށް ހޮވި، ފައިސާ ނުދެއްކުނު މީހުންނަށް ހުޅުމާލެއިން އަގުހެޔޮ ފްލެޓް ދޭން ނިންމައިފި އެވެ.
ހައުސިން މިނިސްޓަރު ޑރ. މުހައްމަދު މުއިއްޒު މިއަދު ކުރެއްވި ޓްވީޓެއްގައި ވިދާޅުވީ ގާކޮށްފި އަދި އަރަބިއްޔާ ފްލެޓްތަކަށް ހޮވި ފައިސާ ނުދެއްކުނު ފަރާތްތަކަށް ހުޅުމާލޭގައި ސަރުކާރުން ހިންގަވާ އަގުހެޔޮ ގެދޮރުވެށިކަމުގެ މަޝްރޫއަކުން ފްލެޓް ދިނުމަށް ސަރުކާރުން ނިންމާފައިވާ ކަމަށެވެ.
'Gaakoshi/Arabiyya' flat thakah hovi, flat ah faisaa nudhekkunu faraaithakah, Hulhumale gai sarukaarun hingavaa aguheyo gedhoruverikamuge mashroou akun, flat dhinumah sarukaarun vanee nimmavaafai.
— Dr Mohamed Muizzu (@MMuizzu) January 31, 2018
ޓާޓާ ކުންފުނިން އިމާރާތް ކޮށްފައިވާ ފްލެޓްތައް ވިއްކުން މެދުކަނޑާލައި އޮތުމަށްފަހު މިއަދު ވަނީ އަނެއްކާވެސް ފްލެޓް ވިއްކުމަށް އޮންލައިން ޕޯޓަލްއެއް މެދުވެރިކޮށް ގަތުމުގެ ފުރުސަތު ހުޅުވާލާފައެވެ.
އެޗްޑީސީ އިން މިއަދު ނެރުނު ބަޔާނުގައި ވިދާޅުވީ އޮންލައިން ޕޯޓަލް މެދުވެރިކޮށް ފްލެޓް ގަތުމަށް ހުށަހަޅާ ފަރާތްތަކުގެ މަޢުލޫމާތު ސައްޙަކަން ކަށަވަރުކުމަށްފަހު، ޝަރުތު ފުރިހަމަވާ ފަރާތްތަކާއި އަދި ޝަރުތު ފުރިހަމަނުވާ ފަރާތްތަކަށް އެސް.އެމް.އެސް މެދުވެރިކޮށް އެކަން އެންގޭނެ ކަމަށެވެ.
މި ޕޯޓާލްއިން ފްލެޓްތައް ބައްލަވައިގަތުމަށްޓަކައި ބޭނުންވާ ހުރިހާ މަޢުލޫމާތެއް ލިބެން ހުންނެ އެވެ. އަދި ފްލެޓްތައް ގަނެވޭނީ އުމުރުން 21 އަހަރު ފުރިފައިވާ ދިވެހި ރައްޔިތުންނަށް އެކަންޏެވެ.