އިދިކޮޅު ފަރާތްތަކުން މިއަދު ރާއްޖޭގެ އެކި ކަންކޮޅުތަކުގައި ބާއްވަމުން އަންނަ "ވާމް އަޕް" އިހުތިޖާޖުތަކުގެ ތެރެއިން އައްޑޫ ސިޓީގައި ކުރިއަށްދާ ވެހިކަލް ބުރަށް ފުލުހުން ހުރަސް އަޅަމުންދާ ކަމަށް މައުލޫމާތު ލިބިއްޖެއެވެ.
ވެހިކަލް ބުރުގެ ބައިވެރިން އައްޑޫގެ ގުޅިފައިވާ ހުރިހާ ރަށެއްގައި ހަރަކާތްތެރިވަމުން އަންނައިރު ހިތަދޫ ބޮޑު މަގުން، ޝީޝާ ކައިރީ ފުލުހުން ވަނީ ޝީލްޑު ޖަހައި މަގު ބަންދުކޮށްފައެވެ.
އަދި މަރަދޫ އަރާ ހިސާބުގައި ވެސް ފުލުހުން ހަރަކާތްތެރި ވަމުން އަންނައިރު އެ ސަރަހައްދުގައި ހަރަކާތްތެރިވަމުން އަންނަ "އައްޑޫލައިވް" ގެ ނޫސްވެރިޔާ މައުލޫމާތުދޭ ގޮތުގައި ފުލުހުން ވަނީ ވެހިކަލް ބުރު ކުރިއަށް ނުގެންދެވޭނެ ކަމަށް އަންގާފައެވެ.
މީގެ އިތުރުން ފޭދޫގައި އެމްޑީޕީ ސަޕޯޓަރުން ވެހިކަލް ބުރަށް ތައްޔާރު ވަމުން ދަނިކޮށް، ބުރު ނުފެށެނީސް ފުލުހުންގެ ފައުޖެއް ވަނީ އެ ސަރަހައްދަށް ގޮސްފައެވެ.