ކުރީގެ ރައީސް މައުމޫނު އަބްދުލް ޤައްޔޫމްގެ ވެރިކަމުގައި ހިންގާފައިވާ ކަމަށް ބުނާ ކޮރަޕްޝަނުގެ މައްސަލައަކާ ގުޅިގެން އެންޓި ކޮރަޕްޝަން ކޮމިޝަން (އޭސީސީ) އިން އެމަނިކުފާނާ ސުވާލު ކުރަން މަސައްކަތް ކުރި ކަމަށް އެމަނިކުފާނުގެ ޤާނޫނީ ވަކީލު ހުސައިން ޝަމީމް ވިދާޅުވެއްޖެ އެވެ.
ޝަމީމް މިހެން ވިދާޅުވެފައި ވަނީ މިއަދު ކުރެއްވި ޓްވީޓެއްގަ އެވެ.
My client @maumoonagayoom told me that @ACC_Maldives tried to question him in relation to some issue dating back to 2007. ACC must realise that my client is entitled to be questioned in the presence of his attorney. Worrying to know ACC don't read CPC.
— Hussain Shameem (@HuShameem) February 22, 2018
އެ ޓްވީޓްގައި ޝަމީމް ވިދާޅުވީ 2007 ވަނަ އަހަރު ހިނގި މައްސަލައަކާ ގުޅިގެން ކަމަށް ބުނެ އޭސީސީ އިން އެމަނިކުފާނާ ސުވާލު ކުރަން މަސައްކަތް ކުރި ކަމަށެވެ.
އަދި ވަކީލެއްގެ ހާޒިރުގައި ސުވާލުތަކަށް ޖަވާބުދާރީވުމުގެ ޙައްޤު އެމަނިކުފާނަށް ލިބިވަޑައިގެންފައިވާކަން އޭސީސީ އަށް އެނގެންޖެހޭނެކަން ފާހަގަ ކުރައްވަމުން ޝަމީމް ވިދާޅުވީ އޭސީސީގެ ބޭފުޅުމް ކްރިމިނަލް ޕްރޮސީޖާ ކޯޑް (ސީޕީސީ) ނުކިޔާތީ ކަންބޮޑުވާކަމަށެވެ.
މީގެ ކުރިން ވެސް ރައީސް މައުމޫނު ވެރިކަމުގައި ހުންނެވި އިރު ކޮރަޕްޝަން މައްސަލައެއް ހިންގެވި ކަމަށް ތުހުމަތުކޮށް އެމަނިކުފާނުގެ ދަރިކަލުން އަދި ދިއްގަރު ދާއިރާގެ މެމްބަރު ފާރިސް މައުމޫނާ ވެސް ފުލުހުން ވަނީ ސުވާލުކޮށްފަ އެވެ. އެއީ ފާރިސް ދައުލަތުން ކޮށްފައިވާ ޚަރަދެއް ނުދައްކާ ކަމަށް ތުހުމަތުކުރުވުމުން ބެލި މައްސަލައެކެވެ.
ރައީސްމައުމޫން މިހާރު ހުންނެވީ ދޫނިދޫ ޖަލުގައެވެ. މި ހިނގާ ފެބްރުއަރީ މަހުގެ ފަސްވަނަ ދުވަހުގެ ރޭ ރައީސް މައުމޫންގެ ގެކޮޅަށް ގަދަ ބާރުން ވަދެގަނެ، ހައްޔަރު ކޮށްފައި ވަނީ ރައްޔިތުންގެ މަޖިލީހުގެ މެމްބަރުންނަށް ރިޝްވަތުދީ، އެމެމްބަރުންނާ ގުޅިގެން ވެރިކަން ވައްޓާލުމަށް މަސައްކަތް ކުރި ކަމުގެ ތުހުމަތުގައެވެ.